قىتايدىڭ Alibaba International Digital Commerce Group كومپانياسىن قازاقستاننىڭ قوسىمشا قۇن سالىعىن تولەۋشىسى رەتىندە شارتتى تىركەۋگە قويۋ تۋرالى شەشىم قابىلداندى، دەپ جازادى Dalanews.kz.
ق ر قارجى مينيسترلىگى مەملەكەتتىك كىرىستەر كوميتەتى ەلىمىزدە ەلەكتروندىق كوممەرسيا مەن سالىق سالۋدى دامىتۋ ماسەلەلەرى بويىنشا Alibaba International Digital Commerce Group كومپانياسىمەن كەزدەسۋ وتكىزدى. كەزدەسۋ بارىسىندا مكك مەن Alibaba International سيفرلىق ەكونوميكاداعى حالىقارالىق سالىق سالۋدى دامىتۋ ماسەلەلەرىن، سونداي-اق قازاقستانداعى ەلەكتروندىق كوممەرسيا سالاسىنداعى سالىق زاڭناماسى مەن اكىمشىلەندىرۋدەگى سوڭعى وزگەرىستەردى تالقىلادى.
"كەزدەسۋ قورىتىندىسى بويىنشا Alibaba International Digital Commerce Group كومپانياسىن ققس تولەۋشىسى رەتىندە شارتتى تىركەۋگە قويۋ تۋرالى شەشىم قابىلداندى"، دەلىنگەن حابارلامادا.
مكك قازاقستان مەن حالىقارالىق كومپانيالار اراسىنداعى سەرىكتەستىك قارىم-قاتىناستاردى نىعايتۋ جانە ەلەكتروندىق كوممەرسيانى ىلگەرىلەتۋ باعىتىندا بەلسەندى جۇمىس جۇرگىزۋدە. بۇل قازاقستانداعى سالىق اكىمشىلەندىرۋدە اشىقتىقتى ارتتىرۋعا جانە ءادىل سالىق سالۋعا ىقپال ەتەدى.
ايتا كەتسەك، 2023 جىلدىڭ قورىتىندىسى بويىنشا قازاقستاندا شارتتى تىركەۋدەن وتكەن 60 شەتەلدىك كومپانيا بار، ولار تولەگەن سالىق سوماسى 34،8 ملرد تەڭگەنى قۇرايدى.
