قازاقستاندا سۋ شارۋاشىلىعى قىزمەتكەرلەرىنىڭ جالاقىسىن كوتەرۋدى كوزدەيتىن "تابيعي مونوپوليالار تۋرالى" زاڭعا ەنگىزىلگەن تۇزەتۋلەر كۇشىنە ەندى، دەپ حابارلايدى Dalanews.kz.
ءقازىر سۋ رەسۋرستارى جانە يرريگاسيا مينيسترلىگى مەن ۇلتتىق ەكونوميكا مينيسترلىگى وسى زاڭدى ىسكە اسىرۋعا باعىتتالعان نورماتيۆتىك-قۇقىقتىق اكتىلەردى تىركەۋ جۇمىستارىن جۇرگىزىپ جاتىر.
"سۋ شارۋاشىلىعى قىزمەتكەرلەرىنىڭ جالاقىسى بيىل قىركۇيەكتەن باستاپ ارتادى. ەل بويىنشا سۋمەن جابدىقتاۋ جانە سۋ بۇرۋ قىزمەتىن كورسەتەتىن 25 مىڭنان اسا قىزمەتكەردىڭ جالاقىسى وسەدى. ايماقتارعا بايلانىستى جانە رەسمي ستاتيستيكالىق مالىمەتتەرگە سايكەس ەڭبەكاقى ورتا ەسەپپەن 35-50%-عا كوبەيەدى"، - دەپ جازىلعان حابارلامادا.
بۇل تۇزەتۋلەردى ازىرلەۋ بىلتىر باستالعان بولاتىن. بيىل ماۋسىمدا زاڭ جوباسىنا مەملەكەت باسشىسى قول قويدى.
