قىرعىزستاننىڭ بۇرىنعى پرەزيدەنتى المازبەك اتامبايەۆ 11 جىلعا سوتتالدى، دەپ حابارلايدى Dalanews.kz.
سوت شەشىمى
بىشكەكتەگى ءبىرىنشى ماي اۋداندىق سوتى قوي-تاش وقيعاسىنا قاتىستى اتىشۋلى ءىس بويىنشا ۇكىم شىعاردى. بۇل ءىس بەس جىلدان استام ۋاقىت بويى قارالىپ كەلگەن ەدى.
Kaktus.media مالىمەتىنشە، باستى ايىپتالۋشى، ياعني قىرعىزستاننىڭ بۇرىنعى پرەزيدەنتى المازبەك اتامبايەۆ 11 جىل 6 ايعا باس بوستاندىعىنان ايىرىلدى. سونىمەن قاتار، سوت ونىڭ بارلىق مەملەكەتتىك ماراپاتتارىن تارتىپ الىپ، مۇلكىن تاركىلەۋگە شەشىم شىعاردى.
ايتا كەتەيىك، بۇعان دەيىن قىرعىزستاننىڭ بۇرىنعى پرەزيدەنتى المازبەك اتامبايەۆقا قاتىستى قوي-تاشتاعى وقيعالار بويىنشا ءوتىپ جاتقان سوتتا تاراپتاردىڭ جارىسسوزدەرى اياقتالدى.
پروكۋرورلار ەكس-پرەزيدەنتتى 11 جىلعا باس بوستاندىعىنان ايىرۋدى سۇراعان ەدى.
قوي-تاشتاعى وقيعا
2019 جىلعى 7 تامىزدا قىرعىزستاننىڭ ارنايى جاساعى المازبەك اتامبايەۆتىڭ قوي-تاشتاعى رەزيدەنسياسىن كۇشتەپ الۋعا تىرىستى. كەلەسى كۇنى ءىىم مەن ۇقمك بىرلەسىپ، ەكىنشى ارنايى وپەراسيا وتكىزىپ، ەكس-پرەزيدەنتتى ۇستاپ اكەتكەن بولاتىن.
وقيعا كەزىندە اتامبايەۆتىڭ جاقتاستارى كۇشتىك قۇرىلىمدارعا تاس لاقتىرىپ، قوقىس پەن دوڭگەلەكتەردى ورتتەگەن. قاقتىعىس ەكى كۇنگە سوزىلىپ، 136 ادام جارالانىپ، ءبىر ارنايى جاساق قىزمەتكەرى وقتان قازا تاپتى.
ەكس-پرەزيدەنتكە ءبىرقاتار قىلمىستىق ءىس بويىنشا ايىپ تاعىلعان:
- 2019 جىلعى قوي-تاشتاعى جاپپاي تارتىپسىزدىككە قاتىسۋ
- جەمقورلىق
- قىلمىستىق جولمەن كەلگەن اقشانى زاڭداستىرۋ
- تۇركيا ازاماتتارىنا زاڭسىز پاسپورت بەرۋ
2020 جىلعى قازانداعى جاپپاي تارتىپسىزدىكتى ۇيىمداستىرۋ ىستەرى بويىنشا دا ايىپ تاعىلعان. الايدا سوڭعى ەكى ءىس بويىنشا اتامبايەۆ اقتالعان.
قوي-تاش وقيعاسىنا قاتىستى ماتەريالدار جەر تەلىمدەرى مەن جەو-عا كومىر جەتكىزۋ ىستەرىمەن بىرىكتىرىلگەن.
ەسكە سالايىق، اتامبايەۆ نازاربايەۆ تۇسىندا "قازاقستان قىرعىز سايلاۋىنا ارالاستى"، "قازاق بيلىگى ۇرى" دەپ سىن ايتىپ، نازاربايەۆتىڭ ءوزىن ديكتاتور دەپ اتاعان ەدى.
