قىرعىزستاندا ۆەبكام-ستۋديالار جەلىسىنىڭ نەگىزىن قالاۋشى دانيەل اجييەۆ كولونيادان شىققاننان كەيىن تىكۇشاقپەن كەتپەك بولعان، دەپ حابارلايدى Dalanews.kz.

ەلدىڭ توتەنشە جاعدايلار مينيسترلىگى تىكۇشاقتىڭ شىنىمەن پايدالانىلعانىن راستادى. الايدا ونى اجييەۆتىڭ ءوزى ەمەس، باسقا ادام جالعا العان. ۇشۋ قۇنى شامامەن 1،5 ملن تەڭگە.

كەيىن بۇل جاعدايعا قىرعىزستان پرەزيدەنتى سادىر جاپاروۆ تا پىكىر ءبىلدىردى. ول اجييەۆتىڭ راقىمشىلىق ارقىلى بوساتىلعانىن راستادى. پرەزيدەنتتىڭ ايتۋىنشا، وعان سوتتالعان ازاماتتىڭ اناسى جۇگىنىپ، وتباسىنداعى اۋىر جاعداي تۋرالى ايتىپ، ۇلىن كەشىرۋدى سۇراعان.

«اجييەۆكە قاتىستى جاعدايعا قايتا ورالساق، مۇنى ەستىگەندە مەن ءوزىم دە تاڭعالدىم. ەگەر اناسى “بىزدە ەشتەڭە قالمادى” دەپ جىلاپ كەلگەن بولسا، ال ونىڭ ۇلى سول كەزدە تىكۇشاق جالعا الىپ، تۇرمەدەن ۇشىپ كەتپەك بولسا، وندا مەن “مەنى الداعان ەكەن” دەپ ويلادىم»، – دەدى ول.

جاپاروۆتىڭ ايتۋىنشا، تىكۇشاق تۋرالى بىلگەننەن كەيىن بورت كەرى بۇرىلعان. سونىڭ ناتيجەسىندە اجييەۆ ۇيىنە تىكۇشاقپەن ەمەس، اۆتوكولىكپەن كەتكەن.

ەسكە سالايىق، 2024 جىلدىڭ كۇزىندە اجييەۆ ۆەبكام-ستۋديالار ۇيىمداستىردى، پورنوگرافيا تاراتتى جانە مۇلىكتىك زالال كەلتىردى دەگەن ايىپپەن 9 جىلعا باس بوستاندىعىنان ايىرىلعان بولاتىن.