قىرعىزستاندا «رەفەرەندۋمعا – جوق!» وپپوزيسيالىق قوزعالىسى كونستيتۋسيانى وزگەرتۋ جونىندە رەفەرەندۋم وتكىزۋگە قارسى جانە پارلامەنتتى تاراتۋ ءۇشىن قول جيناۋدى باستاپ كەتتى. بەلسەندىلەر بيلىكتى حالىق پىكىرىن ەلەمەيدى دەپ ايىپتايدى.
قوزعالىستىڭ ءتورايىمى، ەسەپ پالاتاسىنىڭ بۇرىنعى باسشىسى ەلميرا يبرايموۆا كونستيتۋسياعا ەنگىزىلەتىن وزگەرىستەر ادام قۇقىعىن، گەندەرلىك تەڭدىكتى قاداعالايتىن جانە كوررۋپسياعا قارسى ارنايى ساراپتامادان وتپەدى دەپ مالىمدەدى.
«رەفەرەندۋمنىڭ ءوتۋىن قالايتىندار «جوعارعى جاق» ۇسىنعان كەستە بويىنشا جۇمىس ىستەپ جاتقانىن اشىق مويىندايدى. جوگوركۋ كەنەش دەپۋتاتتارى ازاماتتار پىكىرىمەن ساناسپاستان زاڭداردى، رەگلامەنتتى بۇزىپ جۇمىس ىستەپ جاتىر. بۇل پارلامەنتتىڭ زاڭدىلىعىنا كۇمان كەلتىرەدى»، - دەدى ول.
قوزعالىس مۇشەلەرى 40 كۇن ىشىندە حالىق قولىن جيناپ، ونىڭ ناتيجەسىن 8 قازاندا وتەتىن قۇرىلتايدا جاريالايمىز دەيدى. وسىلايشا ولار رەفەرەندۋمدى بولدىرماۋعا كۇش سالماق.
ەلدە وپپوزيسيانىڭ نارازىلىعىنا قاراماستان بيلىك بۇكىلحالىقتىق داۋىس بەرۋدى وتكىزۋگە دايىندالىپ جاتىر. دۇيسەنبى كۇنى جوگوركۋ كەنەشكە رەفەرەندۋم ۋاقىتىن 4 جەلتوقسانعا بەلگىلەۋ جونىندە زاڭ جوباسى ءتۇستى.
ءارتۇرلى مالىمەتتەرگە قاراعاندا، قىرعىز بيلىگى رەفەرەندۋمدى جەرگىلىكتى كەنەش سايلاۋىمەن بىرىكتىرىپ وتكىزبەكشى. وسك جەرگىلىكتى سايلاۋ مەرزىمىن ءالى جاريالامادى.
