Qyrǵyzstanda «Referendýmǵa – joq!» oppozitsiialyq qozǵalysy Konstitýtsiiany ózgertý jóninde referendým ótkizýge qarsy jáne parlamentti taratý úshin qol jinaýdy bastap ketti. Belsendiler bilikti halyq pikirin elemeidi dep aiyptaidy.
Qozǵalystyń tóraiymy, Esep palatasynyń burynǵy basshysy Elmira Ibraimova Konstitýtsiiaǵa engiziletin ózgerister adam quqyǵyn, genderlik teńdikti qadaǵalaityn jáne korrýptsiiaǵa qarsy arnaiy saraptamadan ótpedi dep málimdedi.
«Referendýmnyń ótýin qalaityndar «joǵarǵy jaq» usynǵan keste boiynsha jumys istep jatqanyn ashyq moiyndaidy. Jogorký Kenesh depýtattary azamattar pikirimen sanaspastan zańdardy, reglamentti buzyp jumys istep jatyr. Bul parlamenttiń zańdylyǵyna kúmán keltiredi», - dedi ol.
Qozǵalys músheleri 40 kún ishinde halyq qolyn jinap, onyń nátijesin 8 qazanda ótetin quryltaida jariialaimyz deidi. Osylaisha olar referendýmdy boldyrmaýǵa kúsh salmaq.
Elde oppozitsiianyń narazylyǵyna qaramastan bilik búkilhalyqtyq daýys berýdi ótkizýge daiyndalyp jatyr. Dúisenbi kúni Jogorký Keneshke referendým ýaqytyn 4 jeltoqsanǵa belgileý jóninde zań jobasy tústi.
Ártúrli málimetterge qaraǵanda, qyrǵyz biligi referendýmdy jergilikti kenesh sailaýymen biriktirip ótkizbekshi. OSK jergilikti sailaý merzimin áli jariialamady.
