قىرعىزستاننىڭ بۇرىنعى پرەزيدەنتى المازبەك اتامبايەۆتىڭ وتباسىن ميليسيا كۇشتەپ ۇيدەن شىعارىپ جىبەرگەن. بۇل تۋرالى الەۋمەتتىك جەلىلەردە ونىڭ بالالارى ءاليا شاگييەۆا مەن قادىربەك اتامبايەۆ مالىمدەدى،- دەپ حابارلايدى Dalanews.kz قىرعىزستاندىق باق-قا سىلتەپ.
ولاردىڭ ايتۋىنشا، قوي-تاش اۋىلىنداعى ۇيدەن ميليسيا شىعارىپ جىبەرگەن. ميليسيا قىزمەتكەرلەرى زاتتاردى شىعارىپ، ارنايى كونتەينەرگە تيەگەن.
ءاليا شاكييەۆا بۇل جاعدايعا قاتىستى "تاۋ-تاۋ بولىپ ۇيىلگەن زاتتارمەن دالادا قالدىردى" دەدى.
اتامبايەۆتار وتباسى سوت پروسەستەرى ءالى جالعاسىپ جاتقاندىقتان، بۇل ارەكەتتى زاڭسىز دەپ ەسەپتەيدى.
كەيىنىرەك قادىربەك اتامبايەۆ ولاردىڭ ۋاقىتشا تۋىستارىنىڭ ۇيىندە تۇرىپ جاتقانىن ايتتى.
ەسكە سالايىق، بۇرىنعى پرەزيدەنتتىڭ ءۇيى ورنالاسقان قوي-تاش اۋىلىنداعى جەر تەلىمى مەملەكەتكە قايتارىلعان. سوت شەشىمىنە سايكەس وعان ىرگەلەس اۋماق تا مەملەكەتكە بەرىلدى.
بۇعان دەيىنگى قوي-تاشتاعى وقيعا
2019 جىلعى 7 تامىزدا قىرعىزستاننىڭ ارنايى جاساعى المازبەك اتامبايەۆتىڭ قوي-تاشتاعى رەزيدەنسياسىن كۇشتەپ الۋعا تىرىستى. كەلەسى كۇنى ءىىم مەن ۇقمك بىرلەسىپ، ەكىنشى ارنايى وپەراسيا وتكىزىپ، ەكس-پرەزيدەنتتى ۇستاپ اكەتكەن بولاتىن.
وقيعا كەزىندە اتامبايەۆتىڭ جاقتاستارى كۇشتىك قۇرىلىمدارعا تاس لاقتىرىپ، قوقىس پەن دوڭگەلەكتەردى ورتتەگەن. قاقتىعىس ەكى كۇنگە سوزىلىپ، 136 ادام جارالانىپ، ءبىر ارنايى جاساق قىزمەتكەرى وقتان قازا تاپتى.
ەكس-پرەزيدەنتكە ءبىرقاتار قىلمىستىق ءىس بويىنشا ايىپ تاعىلعان:
- 2019 جىلعى قوي-تاشتاعى جاپپاي تارتىپسىزدىككە قاتىسۋ
- جەمقورلىق
- قىلمىستىق جولمەن كەلگەن اقشانى زاڭداستىرۋ
- تۇركيا ازاماتتارىنا زاڭسىز پاسپورت بەرۋ
2020 جىلعى قازانداعى جاپپاي تارتىپسىزدىكتى ۇيىمداستىرۋ ىستەرى بويىنشا دا ايىپ تاعىلعان. الايدا سوڭعى ەكى ءىس بويىنشا اتامبايەۆ اقتالعان.
قوي-تاش وقيعاسىنا قاتىستى ماتەريالدار جەر تەلىمدەرى مەن جەو-عا كومىر جەتكىزۋ ىستەرىمەن بىرىكتىرىلگەن.
ەسكە سالايىق، اتامبايەۆ نازاربايەۆ تۇسىندا "قازاقستان قىرعىز سايلاۋىنا ارالاستى"، "قازاق بيلىگى ۇرى" دەپ سىن ايتىپ، نازاربايەۆتىڭ ءوزىن ديكتاتور دەپ اتاعان ەدى.
