Qyrǵyzstannyń burynǵy prezidenti Almazbek Atambaevtyń otbasyn militsiia kúshtep úiden shyǵaryp jibergen. Bul týraly áleýmettik jelilerde onyń balalary Áliia Shagieva men Qadyrbek Atambaev málimdedi,- dep habarlaidy Dalanews.kz qyrǵyzstandyq BAQ-qa siltep.
Olardyń aitýynsha, Qoi-Tash aýylyndaǵy úiden militsiia shyǵaryp jibergen. Militsiia qyzmetkerleri zattardy shyǵaryp, arnaiy konteinerge tiegen.
Áliia Shakieva bul jaǵdaiǵa qatysty "taý-taý bolyp úiilgen zattarmen dalada qaldyrdy" dedi.
Atambaevtar otbasy sot protsesteri áli jalǵasyp jatqandyqtan, bul áreketti zańsyz dep esepteidi.
Keiinirek Qadyrbek Atambaev olardyń ýaqytsha týystarynyń úiinde turyp jatqanyn aitty.
Eske salaiyq, burynǵy prezidenttiń úii ornalasqan Qoi-Tash aýylyndaǵy jer telimi memleketke qaitarylǵan. Sot sheshimine sáikes oǵan irgeles aýmaq ta memleketke berildi.
Buǵan deiingi Qoi-Tashtaǵy oqiǵa
2019 jylǵy 7 tamyzda Qyrǵyzstannyń arnaiy jasaǵy Almazbek Atambaevtyń Qoi-Tashtaǵy rezidentsiiasyn kúshtep alýǵa tyrysty. Kelesi kúni IIM men UQMK birlesip, ekinshi arnaiy operatsiia ótkizip, eks-prezidentti ustap áketken bolatyn.
Oqiǵa kezinde Atambaevtyń jaqtastary kúshtik qurylymdarǵa tas laqtyryp, qoqys pen dóńgelekterdi órttegen. Qaqtyǵys eki kúnge sozylyp, 136 adam jaralanyp, bir arnaiy jasaq qyzmetkeri oqtan qaza tapty.
Eks-prezidentke birqatar qylmystyq is boiynsha aiyp taǵylǵan:
- 2019 jylǵy Qoi-Tashtaǵy jappai tártipsizdikke qatysý
- Jemqorlyq
- Qylmystyq jolmen kelgen aqshany zańdastyrý
- Túrkiia azamattaryna zańsyz pasport berý
2020 jylǵy qazandaǵy jappai tártipsizdikti uiymdastyrý isteri boiynsha da aiyp taǵylǵan. Alaida sońǵy eki is boiynsha Atambaev aqtalǵan.
Qoi-Tash oqiǵasyna qatysty materialdar jer telimderi men JEO-ǵa kómir jetkizý isterimen biriktirilgen.
Eske salaiyq, Atambaev Nazarbaev tusynda "Qazaqstan qyrǵyz sailaýyna aralasty", "qazaq biligi ury" dep syn aityp, Nazarbaevtyń ózin diktator dep ataǵan edi.
