ءبىر كەزدەرى قىرعىزستان قازاقستانعا بەرگەن پانسيوناتتار قايتادان قىزۋ تالقىعا ءتۇستى. بىشكەك استانامەن 18 جىل بۇرىن جاسالعان كەلىسىمگە وزگەرىستەر ەنگىزبەك، - دەپ حابارلايدى Dalanews.kz "ناستوياششەە ۆرەميا. ازياعا" سىلتەمە جاساپ.
2006 جىلى قىرعىزستان قازاقستانعا 4 پانسيونات نىسانىن بەرگەن بولاتىن. بۇل جەرلەر قازاقستانعا 49 جىلعا جالعا بەرىلگەن ەدى. كەلىسىمنىڭ ەڭ باستى شارتى - قازاقستاندىقتار ول جەرلەردە زاماناۋي قوناقۇيلەر سالۋى كەرەك بولعان. ارادا 18 جىل وتكەن، الايدا قوناقۇيلەر ءالى سالىنباعان، ال ءتورت پانسيوناتتىڭ ۇشەۋى توزىپ كەتكەن.
"قازاقستان ول جەردە 3، 4 جۇلدىزدى قوناقۇيلەر سالۋى كەرەك بولعان. ءبىراق كەلىسىمدە تالاپتار بەلگىلەنبەگەن جانە ولار ورىندالماسا قانداي جاۋاپكەرشىلىك كوزدەلگەنى جازىلماعان. قازىرگى تاڭدا كەلىسىمدە 5 جىل مەرزىم بەلگىلەندى. ەگەر پانسيوناتتار وسى ۋاقىت ارالىعىندا قوناقۇيگە اينالماسا، قىرعىزستان 60 كۇننىڭ ىشىندە قازاقستان پانسيوناتتارعا سالعان اقشانى قايتارماي-اق كەلىسىمدى بۇزا الادى"، - دەيدى قىرعىزستاننىڭ ەكونوميكا جانە كوممەرسيا ءمينيسترىنىڭ ورىنباسارى يسكەندەر اسىلكۋلوۆ.
قىرعىزستاننىڭ مينيسترلەر كابينەتىنىڭ بۇل ۇسىنىسىن پارلامەنتتىڭ بەيىندىك كوميتەتى قولداعان. بۇل ۇسىنىستى ەلدىڭ بارلىق زاڭ پالاتاسى دا قولداۋى مۇمكىن.
ال قازاقستان ۇكىمەتى مۇنداي تۇزەتۋلەرگە قالاي قارايتىنى ازىرگە بەلگىسىز.
كەلىسىمدەگى وزگەرىس ىسكە اسا باستاۋى ءۇشىن ونى ەكى ەلدىڭ دە پارلامەنتتەرى راتيفيكاسيالاۋى كەرەك.
ايتا كەتەيىك، قىرعىزستان ىستىق كولدە وزبەكستانعا دا پانسيوناتتارىن بەرگەن بولاتىن. بىشكەك پەن تاشكەنت پانسيوناتتار كىمگە تيەسىلى ەكەنىن ۇزاق تالقىلاپ، بىلتىر كەلىسىمگە كەلگەن. قىرعىزستان پانسيوناتتاردى وزبەكستانعا دا 49 جىلعا جالعا بەرەتىن بولدى. وزبەكستانعا دا زاماناۋي قوناقۇيلەر سالۋ كەرەك دەگەن شارت قويىلعان.
