شىمكەنتتە ەكس-شەنەۋنىك پەن سىبايلاسى سوتتالدى،- دەپ حابارلايدى Dalanews.kz.
سوت مالىمەتىنشە، د. سالالىق مينيسترلىكتە لاۋازىمدى تۇلعا بولا تۇرا، 2016-2023 جىلدار ارالىعىندا جابىرلەنۋشى د.-نى الداۋ ارقىلى ءبىلىم سالاسىنداعى بيزنەسىنە قامقورلىق جاساۋعا ۋادە بەرىپ، ودان بىرنەشە رەت اقشا العان. الاياقتىق جولمەن العان اقشا 124 ميلليون تەڭگەدەن اسىپ كەتكەن.
"سوتتالۋشى د. شىمكەنت قالاسىنىڭ اۋماعىندا جەكە مەنشىك جالپى ءبىلىم بەرەتىن مەكتەپ سوعىپ، ونى پايدالانۋعا تاپسىرعان. وسىلايشا سوتتالۋشى د. قىلمىستىق جولمەن العان اقشانى زاڭداستىرعان"، - دەپ جازىلعان سوت مالىمەتىندە.
ودان بولەك تاعى ءبىر ايىپتالۋشى سوتتالۋشى د.-نىڭ وتىنىشىمەن جابىرلەنۋشى د.-عا قاتىستى قوزعالعان قىلمىستىق ءىستى توقتاتۋ تۋرالى شەشىم قابىلداتىپ بەرەمىن دەپ جابىرلەنۋشىدەن 10 ميلليون تەڭگە اقشا العان.
سوتتالۋشىلاردىڭ كىناسى تولىق دالەلدەنگەن.
سوت بۇرىنعى شەنەۋنىكتى كىنالى دەپ تانىپ، تۇپكىلىكتى 7 جىل 6 اي مەرزىمگە باس بوستاندىعىنان ايىرۋ جازاسىن تاعايىندادى.
ونىڭ سىبايلاسى دا كىنالى دەپ تانىلىپ، 4 جىلعا باس بوستاندىعىن شەكتەۋ جازاسى تاعايىندالدى. دەگەنمەن "قازاقستان رەسپۋبليكاسىنىڭ كونستيتۋسياسىنىڭ وتىز جىلدىعىنا بايلانىستى راقىمشىلىق جاساۋ تۋرالى" زاڭىنىڭ تالاپتارىنا سايكەس ت.-عا تاعايىندالعان جازا مەرزىمىنىڭ 1/3 بولىگى قىسقارتىلىپ، تۇپكىلىكتى 2 جىل 8 اي مەرزىمگە باس بوستاندىعىن شەكتەۋ جازاسىن تاعايىندالدى.
جەكە مەنشىك جالپى ءبىلىم بەرۋ مەكتەبى جەر تەلىمىمەن بىرگە مەملەكەت پايداسىنا تاركىلەندى. جابىرلەنۋشىنىڭ تالاپ ارىزى ءىشىنارا قاناعاتتاندىرىلدى، ونىڭ پايداسىنا بۇرىنعى شەنەۋنىكتەن 67،4 ميلليون تەڭگە ءوندىرىلدى.
