قدب اوك جوبالارىن 1،2 ترلن تەڭگەگە قارجىلاندىرادى. بۇل تۋرالى قازاقستان پرەمەر-مينيسترى ولجاس بەكتەنوۆكە جۇمىس كەڭەسى بارىسىندا «قازاقستان دامۋ بانكى» اق باسقارما ءتوراعاسى مارات ەلىبايەۆ باياندادى.
مەملەكەت باسشىسى قاسىم-جومارت توقايەۆتىڭ «ادىلەتتى قازاقستاننىڭ ەكونوميكالىق باعدارى» اتتى حالىققا جولداۋىن ىسكە اسىرۋ شەڭبەرىندە بانك اۋىل شارۋاشىلىعىن دامىتۋ بويىنشا باسىم باعىتتارعا تالداۋ جاسادى. ولاردىڭ ىشىندە ەت، ءسۇت جانە استىقتى تەرەڭ وڭدەۋ، ونەركاسىپتىك جىلىجاي شارۋاشىلىعىن دامىتۋ، قۇس فابريكالارىن، كوكونىس قويمالارىن جانە ەتتى مال شارۋاشىلىعى كاسىپورىندارىن سالۋ ماسەلەلەرى بار.
مارات ەلىبايەۆ قدب-نىڭ ەكىنشى دەڭگەيلى بانكتەرمەن جانە باسقا دا قارجى ينستيتۋتتارىمەن بىرلەسە وتىرىپ، اگروونەركاسىپ كەشەنىندەگى ينۆەستيسيالىق جوبالاردى ىسكە اسىرۋ ءۇشىن جالپى سوماسى 1 ترلن 220 ملرد تەڭگەگە قارجىلاندىرۋدى قامتاماسىز ەتۋگە دايىن ەكەندىگى تۋرالى باياندادى.
قازىرگى ۋاقىتتا بانك وتاندىق ينۆەستورلاردىڭ جاڭا جوبالارىن قاراۋعا كىرىستى.
ۇكىمەت باسشىسى ولجاس بەكتەنوۆ بانك باسشىلىعىنا ازىق-تۇلىك قاۋىپسىزدىگىن قامتاماسىز ەتۋگە، يمپورتتى الماستىرۋعا جانە وتاندىق اۋىل شارۋاشىلىعى ونىمدەرىنىڭ ەكسپورتىن ۇلعايتۋعا باعىتتالعان ينۆەستيسيالىق جوبالارعا باسىمدىق بەرە وتىرىپ قاراۋدى تاپسىردى.
ايتا كەتۋ كەرەك، قدب-نىڭ اگروونەركاسىپ سەكتورىندا جوبالاردى جۇزەگە اسىرۋدا تاجىريبەسى بار. ونىڭ ىشىندە اقمولا وبلىسىندا ەت وندىرەتىن قۇس فابريكاسىن، مايلى داقىلدار وڭدەۋ زاۋىتتارىن سالۋ جانە جاڭعىرتۋ جۇمىستارىن اتاپ كورسەتۋگە بولادى. سونداي-اق بانكتىڭ قارجىلاندىرۋىمەن تۇركىستان وبلىسىندا ەلىمىزدەگى ەڭ ءىرى جىلىجاي كەشەنىنىڭ قۇرىلىسى باستالدى، ونىڭ ءبىرىنشى كەزەڭى كەلەسى جىلى ىسكە قوسىلادى دەپ جوسپارلانىپ وتىر.
