ءال-فارابي اتىنداعى قازۇۋ-دىڭ باسپا ءسوز قىزمەتى الەۋمەتتىك جەلىدە جاريالانعان بەينەتۇسىرىلىمگە قاتىستى اقپاراتتى جوققا شىعارادى.

№17 جاتاقحانا 1990 جىلى سالىنعان. بيىل بارلىق ستۋدەنتتەر ۇيىندە جۇرگىزىلگەن اعىمداعى جوندەۋ جۇمىستارى كەزىندە ەسىكتەرى اۋىستىرىلىپ، توڭازىتقىشتار مەن ەلەكتر پليتالارى جاڭارتىلدى.

توسەك-ورىندارى مەن جامىلعىلار جاڭادان الىنىپ، جيھازدار اۋىستىرىلدى. سانتەحنيكا جانە ەلەكترلىك جەلىلەرى ورناتىلدى. جاڭا وقۋ جىلىندا دەزينفەكسيالىق جۇمىستار جۇرگىزىلدى. بۇگىنگى ارناۋلى رەيد بارىسىندا جاتاقحانا قايتا تەكسەرىلىپ، الەۋمەتتىك جەلىدەگى اقپارات راستالعان جوق. ستۋدەنتتەر تاراپىنان شاعىمدار ايتىلمادى.

ستۋدەنتتەر قالاشىعىنىڭ ديرەكتورى ءابدىقاھار سەيىتجانوۆ:
اعىمداعى جوندەۋ جۇمىستارى كەزىندە جاتاقحانادان ستۋدەنتتەر شىعارىلدى. ارنايى قۇرىلىسشىلار جۇمىس ىستەدى. الەۋمەتتىك جەلىدەگى جاريالانعان بەينەتۇسىرىلىم جاز مەزگىلىندە تۇسىرىلگەن. وقيعانى ءقازىر بولىپ جاتقان سەكىلدى كورسەتىپ وتىر. بۇگىنگى تاڭدا مۇنداي كەلەڭسىز جاعدايلار ورىن العان جوق.

ءال-فارابي اتىنداعى قازۇۋ فيلولوگيا فاكۋلتەتىنىڭ ستۋدەنتى توميريس قۋانىش:
ءال-فارابي اتىنداعى قازۇۋ-دا الىمجەتتىك كورسەتىلىپ جاتىر دەگەن ماسەلەگە كەلىسپەيمىن. قاراشاڭىراق قازۇۋ-دىڭ فيلولوگيا فاكۋلتەتىنە اتا-اجەسىنىڭ تاربيەسىن كورگەن جاستار وقۋعا تۇسەدى دەپ سانايمىن. ۇلكەن اۋلەتتىڭ تاربيەسىن كورگەن، سونداي-اق قازاقتىڭ ءتىلى مەن ادەبيەتىن وقيتىن بالالار بىر-بىرىنە الىمجەتتىك جاساپ، تەلەفونىن تارتىپ الادى دەپ ويلامايمىن.

ءال-فارابي اتىنداعى قازۇۋ فيلولوگيا فاكۋلتەتىنىڭ ستۋدەنتى كەنجەبەك بالتاباي:
جىگىتتەردىڭ اراسىندا الىمجەتتىك كورسەتۋ بۇعان دەيىن بولعان ەمەس. ءبىزدىڭ فاكۋلتەتتە ساناۋلى ۇلدار بار. ءبارىمىز اعا-ىنىدەي سويلەسىپ، بىر-بىرىمىزگە سىيلاستىق تانىتامىز. فاكۋلتەتتىڭ كەز-كەلگەن جىگىتىنەن سۇراساڭىز بارلىعى وسىلاي جاۋاپ بەرەدى دەپ ويلايمىن.