قازاقستان بۇگىنگى تاڭدا ساپالى بىلىمىمەن كوزگە تۇسكەن ەلدەردىڭ ءبىرى بولىپ تابىلادى. ەل پرەزيدەنتى قاسىم-جومارت توقايەۆ بىلىمگە كوپ كوڭىل بولۋدە. ءبىز ونى سالىنىپ جاتقان الەمدىك ستاندارتقا ساي ءتۇرلى مەكتەپتەر مەن جوعارعى وقۋ ورىندارىنان بايقايمىز.

سونداي ۋنيۆەرسيتەتتەردىڭ ءبىرى – ءال-فارابي اتىنداعى قازاق ۇلتتىق ۋنيۆەرسيتەتى. قازاق ۇلتتىق ۋنيۆەرسيتەتى – ىرگەلى ءبىلىم وشاعى، عىلىم مەن مادەنيەتتىڭ ورتالىعى. قازاق حالقىنىڭ زاڭعار پەرزەنتتەرى قىزمەت ەتكەن، تالاي تالانتتى ۇل-قىزدارى شىققان قارا شاڭىراق. ءال-فارابي اتىنداعى قازۇۋ – ەلىمىزدەگى تاريحى تەرەڭ، ەرەكشە مارتەبەگە يە جوعارى وقۋ ورنى جانە QS WUR بويىنشا الەمنىڭ ەڭ ۇزدىك 200 ۋنيۆەرسيتەتىنىڭ توبىنا كىرەدى. QS WUR جاھاندىق رەيتينگىنىڭ قورىتىندىسى بويىنشا ءال-فارابي اتىنداعى قازاق ۇلتتىق ۋنيۆەرسيتەتى 230-ورىنعا يە بولدى.

حالىق­ارالىق دەڭگەيدەگى رەيتينگتە جوعارعى كورسەتكىش ۇلكەن جەتىستىك. ۋنيۆەرسيتەتتىڭ دامۋىنا سۇبەلى ۇلەس قوسىپ، ەڭبەك ەتكەن وقىتۋشى-پروفەسسورلار قۇرامى، عالىمدار ەكەنىن ايتىپ وتكىم كەلەدى.الەمنىڭ ۇزدىك ۋنيۆەرسيتەتتەرىمەن ءبىر قاتارعا ورنالاسقان ءال-فارابي اتىنداعى قازۇۋ قازاقستاننىڭ جوعارى وقۋ ورىندارى اراسىندا عانا ەمەس، ورتالىق ازيا مەن تمد ەلدەرىندە ءوزىنىڭ كوشباسشىلىق پوزيسياسىن دالەلدەدى.

سونىمەن قاتار، قازۇۋ – QS Stars Rating System حالىقارالىق رەيتينگىندە «بەس جۇلدىز» ماراپاتىن العان ورتالىق ازياداعى العاشقى جانە جالعىز جوعارى وقۋ ورنى. سونداي-اق QS by Subject پاندىك رەيتينگىندە ۋنيۆەرسيتەت ءتورت ءپان سالاسى مەن 16 دايىندىق باعىتى بويىنشا ۇزدىكتەر قاتارىنا كىرەدى.   سونداي-اق، قازۇۋ قالاشىعىنىڭ تاعى ءبىر ەرەكشەلىگى — ءو.ا. جولداسبەكوۆ اتىنداعى ستۋدەنتتەر سارايى.

مۇندا قازاق ۇلتتىق اسپاپتار وركەسترى، كوركەمونەر ۇيىرمەلەرى، «ءبىز» ستۋدەنتتەر تەاترى بار.قازۇۋ الەمدەگى ەڭ وزىق تەحنولوگيالىق 50 ۋنيۆەرسيتەتتىڭ ءبىرى.

بەلگىلى «GreatValueColleges» حالىقارالىق ۇيىمىنىڭ رەيتينگىندە قازاقستاندىق ۋنيۆەرسيتەت تمد ەلدەرىنىڭ عانا ەمەس، سونىمەن قاتار شىعىس جانە ورتالىق ەۋروپانىڭ جالعىز وكىلى بولىپ تابىلادى. قازۇۋ-دىڭ تاعى ءبىر كەرەمەت جەتىستىگى «كەرەمەت» ستۋدەنتتەرگە قىزمەت كورسەتۋ ورتالىعى. «كەرەمەت» كەشەنىندە ستۋدەنتتەر قاجەتتى قۇجاتتارىن رەسىمدەۋگە، زاڭگەرلەر مەن بىلىكتى مامانداردىڭ كەڭەسىنە جۇگىنۋگە، قىزمەتكە ورنالاسۋ ءۇشىن قۇجات تاپسىرۋعا، ءتىپتى، مەديسينالىق كومەك، ينتەرنەت-كافە، ۇشاق جانە تەمىرجول كاسسالارى، كينوتەاتر، شاعىن سۋپەرماركەت سەكىلدى اسا قاجەتتى قىزمەتتىڭ بارلىق تۇرىنە قول جەتكىزە الادى.

قازىرگى تاڭدا قازۇۋ جۇڭگو ۋنيۆەرسيتەتتەرىمەن تىعىز بايلانىستا. قازۇۋ مەن جۇڭگو ۋنيۆەرسيتەتتەرى اراسىندا بەلسەندى اكادەميالىق كەلىسىم بار. 2019-2023 وقۋ جىلىندا قازۇۋ-دىڭ 79 ستۋدەنتى (دوكتورانتۋرا، ماگيستراتۋرا، باكالاۆريات باعدارلامالارى بويىنشا) عىلىمي تاعىلىمدامادان ءوتتى جانە جۇڭگو ۋنيۆەرسيتەتتەرىندەگى جازعى مەكتەپتەرگە قاتىستى. سونداي-اق 37 وقىتۋشى بىلىمدەرىن جەتىلدىرۋ ماقساتىندا قحر ۋنيۆەرسيتەتتەرىندە عىلىمي كونفەرەنسيالارعا قاتىسىپ، تاجىريبە الماستى. بۇگىندە قازۇۋ-دا 409 قىتايلىق ستۋدەنت ءبىلىم الۋدا، ونىڭ 94ء-ى مەملەكەتتىك ءبىلىم گرانتىندا، 315ء-ى كەلىسىمشارت بويىنشا. قازۇۋ-دا قىتايتانۋ كافەدراسى جۇمىس ىستەيدى، ول 3 دەڭگەيلىك جۇيە بويىنشا: باكالاۆر، ماگيستراتۋرا، دوكتورانتۋرا (PhD) بويىنشا قىتايتانۋ ماماندارىن دايىندايدى. ۋنيۆەرسيتەتتە بۇگىنگە دەيىن قىتايتانۋ كافەدراسى مەن كونفۋسيي ينستۋتى تابىستى جۇمىس ىستەپ كەلەدى. قازۇۋ جۇڭگو ۋنيۆەرسيتەتتەرىمەن سەرىكتەستىكتە ەكى ورتالىق اشتى: بەيجىڭ شەت تىلدەر ۋنيۆەرسيتەتىندە قازاقستان ورتالىعى جانە شانحاي ۋنيۆەرسيتەتىندە «قازاقستان ورتالىعى». بۇل ورتالىقتاردىڭ نەگىزگى عىلىمي قىزمەتى سەرىكتەستەرمەن بىرلەسە وتىرىپ، قازاق ءتىلىن ۇيرەنۋگە ارنالعان وقۋ-ادىستەمەلىك ماتەريالدى قۇراستىرۋعا جانە قازۇۋ-دا دايىندالعان وقۋلىقتاردى قىتايدا قايتا باسۋعا باعىتتالعان. جۋىردا ءال-فارابي اتىنداعى قازۇۋ بازاسىندا سولتۇستىك-باتىس پوليتەحنيكالىق ۋنيۆەرسيتەتىنىڭ فيليالى اشىلدى. اتالعان فيليالدان تەحنيكالىق باعىتتاعى بىلىكتى ماماندار دايارلانادى. سونىمەن قاتار وقۋ ورداسىندا «ءبىر بەلدەۋ – ءبىر جول» باستاماسىنىڭ 10 جىلدىعىنا وراي ورتالىق ازيا – جۇڭگو جوعارى ءبىلىم ىنتىماقتاستىق فورۋمى وتكەن بولاتىن. ءال-فارابي اتىنداعى قازۇۋ قىتايدىڭ 50-دەن استام جوعارى وقۋ ورنىمەن بايلانىس ورناتقان.

قارا شاڭىراقتا لايىقتى دارەجەدە ءبىلىم الۋعا تىرىساتىن ءار ستۋدەنت ءۇشىن كەرەمەت مۇمكىندىكتەر جاسالعان.ەل ەرتەڭى-بىلىمدى ۇرپاق ەكەنىن ەسكەرسەك، وزىمىزگە بەرىلگەن بارلىق مۇمكىندىكتى تولىق پايدالانىپ، ەلىمىزدىڭ جارقىن بولاشاعى ءۇشىن قىزمەت اتقارۋ بىزگە اتا-بابادان قالعان مۇرا ەكەنىن جادىمىزدا ۇستاۋ كەرەك. وسى مىندەتتى ابىرويمەن الىپ ءجۇرۋ، جاستار ءۇشىن باستى ماقسات دەپ ەسەپتەيمىن. ءال-فارابي اتىنداعى قازاق ۇلتتىق ۋنيۆەرسيتەتى – ءار قازاق ءۇشىن اياۋلى مەكەن. مۇندا تالاي جاقسىلاردىڭ ءىزى قالعان، تالاي قازاق ءبىلىم العان، تالاي ادام ارمانىمەن كەزدەسكەن، ماقساتىنا جەتكەن. قازۇۋ-دى  ەلىمىزدىڭ بارلىق جوعارعى ءبىلىم بەرۋ جۇيەسىنىڭ تىرەگى، بىلىكتى ماماندار ورداسى دەۋگە بولادى.

 

لي فان

ءال-فارابي اتىنداعى قازۇۋ-دىڭ زاڭ فاكۋلتەتى كەدەن قارجى جانە ەكولوگيالىق قۇقىق كافەدراسىنىڭ دوكرانتى

عىلىمي جەتەكشىسى:قالىمبەك باقىتجان

 ءال-فارابي اتىنداعى قازۇۋ-دىڭ زاڭ فاكۋلتەتى كەدەن قارجى جانە ەكولوگيالىق قۇقىق كافەدراسىنىڭ ز.ع.ك.،قاۋىمداستىرىلعان پروفەسسورى