ءال-فارابي اتىنداعى قازاق ۇلتتىق ۋنيۆەرسيتەتىنىڭ عالىمدارى تومەنگى سورتتى كومىردى پايدالانا وتىرىپ بيوتىڭايتقىش ازىرلەپ شىعاردى، – دەپ حابارلايدى Dalanews.kz ءال-فارابي اتىنداعى قازۇۋ-دىڭ باسپا ءسوز قىزمەتى سىلتەمە جاساپ.
قازاق-نەمىس-قىتاي حالىقارالىق قولدانبالى ميكروبيولوگيا عىلىمي زەرتحاناسىنىڭ ماماندارى جۇزەگە اسىرعان جوبانىڭ باستى ماقساتى – ەلىمىزدەگى وزەكتى ماسەلەلەردىڭ ءبىرى – توپىراقتىڭ تۇزدانۋىن قالىپقا كەلتىرۋ جانە تومەنگى ساپاسىز كومىردى كادەگە جاراتۋ.
عالىمدار ءونىمدى سۇيىق جانە ۇنتاق كۇيىندە شىعارادى. بيولوگيالىق تىڭايتقىش داقىلداردىڭ ونىمدىلىگىن ارتتىرىپ قانا قويماي، ادامدار مەن قورشاعان ورتاعا ەشقانداي زيانىن تيگىزبەيدى.
– توپىراقتىڭ تۇزدانۋى الەم بويىنشا ەكولوگيالىق ماسەلە بولىپ تابىلادى، ياعني توپىراقتىڭ تۇزدانۋى ادام دەنساۋلىعى مەن وسىمدىكتىڭ ونىمدىلىگىنە كەرى اسەر ەتەدى.
بۇگىنگى تاڭدا وزەكتى ماسەلەنى جويۋ ءۇشىن ءتۇرلى حيميالىق ادىستەر قولدانىلادى. دەگەنمەن بۇل ءادىس ءتيىمدى ناتيجە كورسەتكەنىمەن، قورشاعان ورتاعا زيان كەلتىرەدى.
ال ءبىزدىڭ دايىنداعان بيولوگيالىق ءونىم تەك ەكونوميكالىق تۇرعىدان ەمەس، سونىمەن قاتار اۋىل شارۋاشىلىعى سالاسى ءۇشىن دە ءقاۋىپسىز جانە ءتيىمدى. تۇزدانعان جانە قاراپايىم توپىراقتا ميكروورگانيزمدەردىڭ قالىپتى ميكروفلوراسى بولادى. ءبىز سول ميكروفلورانى ءبولىپ الىپ، سولاردىڭ كومەگىمەن تومەنگى ساپالى كومىردى بيوسوليۋبيليزاسيالاۋ ارقىلى گۋميندى زات ءبولىپ الىپ، الىنعان ءونىمدى تىڭايتقىش رەتىندە ەنگىزەمىز.
كەيىن تىڭايتقىشتى تۇزدانعان توپىراقپەن ارالاستىرعاندا وڭ ناتيجە بەرەدى. دەمەك، توپىراقتاعى تۇزدىڭ كونسەنتراسياسى ازايىپ، قالىپتى نورماعا كەلتىرىلەدى، – دەيدى قازۇۋ-دىڭ كىشى عىلىمي قىزمەتكەرى بەكزات كامەنوۆ.
عالىمدار اتالعان عىلىمي جوبانى نارىققا شىعارۋدى كوزدەپ وتىر. بۇگىنگى تاڭدا زەرتحانا ماماندارى ونىمگە پاتەنت الۋ جانە كوممەرسيالاندىرۋ بويىنشا جۇمىستاردى جۇرگىزۋدە.
