بۇل تەڭدەسى جوق جوبا عۇلاما ءال-فارابيدىڭ ادامزات ءۇشىن ەڭ باستى دەپ ساناعان قۇندىلىقتارى: مەيىرىمدىلىك، پاراساتتىلىق، ادالدىق جانە ادىلدىك تۋرالى ەسكە سالۋ ءۇشىن ەلدەگى يگى ىستەر ەستافەتاسىن ىسكە قوستى.
چەللەندجگە كەز كەلگەن ادام قاتىسا الادى. ول ءۇشىن الەۋمەتتىك جەلىلەردە قايىرىمدى ىس-ارەكەتتەر، قايىرىمدى جانە ىزگى ىستەر تۋرالى پوست، فوتوسۋرەتتەر نەمەسە ۆيدەوروليك جاريالاۋ جەتكىلىكتى. چەللەندجدىڭ ۇيىمداستىرۋشىلارى ەستافەتانى جالعاستىرۋدى جانە ونى #AlFarabiQQ حەشتەگىمەن سۇيەمەلدەۋدى ۇسىنادى.
«ءال-فارابي «باقىتتىڭ ءمانى – پاراساتتىلىقتا، اركىمنىڭ ءوز الدىندا يگىلىكتى ماقسات قويا بىلۋىندە... ادامنىڭ ءوز مىنەز-قۇلقىن، ىس-ارەكەتىن ەرىكتى تۇردە وزگەرتىپ، يگىلىككە باعىتتاپ وتىرۋىندا»، – دەگەن بولاتىن. ءاربىر ادامنىڭ جاقسىلىق جاساۋعا، ءوزىن جانە اينالاسىنداعىلاردى باقىتتى ەتۋگە بار كۇش-جىگەرى جەتەدى. ەگەر ءبىز ءارقايسىمىز ءوز-وزىمىزدى جەتىلدىرۋگە جانە جاقسى ىس-ارەكەتتەر جاساۋعا ۇمتىلساق، بارشامىز بىرگە قازاقستاندى قۋاتتى ۇلت پەن جاۋاپتى ادامداردان تۇراتىن - تابىستى، قايىرىمدى ەلگە اينالدىرامىز»، – دەيدى فلەش-موبقا قاتىسقان ەكىنشى كۋرس ستۋدەنتى حاسان نۇرسات.
جوبا جاستار اراسىندا ۆولونتەرلىك قوزعالىستى دامىتۋعا، الەۋمەتتىك ىنتىماقتاستىقتى نىعايتۋعا جانە تەك جاھاندىق عانا ەمەس، سونىمەن قاتار جەرگىلىكتى قوعامداستىق ماسەلەلەرىن دە شەشۋ بويىنشا باستاماشىلىق توپتاردى ۇيىمداستىرۋعا، ناقتى ادامدارعا كومەك كورسەتۋگە باعىتتالعان. چەللەندج مەدياكەڭىستىكتە وڭ كوزقاراس كورسەتۋگە جانە بىر-بىرىنە مەيىرىمدىلىك پەن جاناشىرلىق تانىتا وتىرىپ، قيىن قىستاۋ جاعدايعا تاپ بولعان ادامداردىڭ ومىرىنە بەي-جاي قاراماي، بىر-بىرىنە كومەكتەسۋ ارقىلى، ناقتى ىس-ارەكەتتەر جاساۋدىڭ ماڭىزدى ەكەنىن ەسكە تۇسىرۋگە مۇمكىندىك بەرەدى.
