ءال-فارابي اتىنداعى قازۇۋ كىتاپتى ازەربايجان ادەبيەتىنىڭ كلاسسيگى، جازۋشى، كورنەكتى عالىم-پەداگوگ ءمىر جالەل ءالي پاشايەۆتىڭ 115 جىلدىق مەرەيتويىنا وراي باسىپ شىعاردى.
تاعىلىمدى شاراعا ۋنيۆەرسيتەت باسشىلىعى، ازەربايجان رەسپۋبليكاسى ۇلتتىق ءماجىلىسى مادەنيەت كوميتەتىنىڭ ءتوراعاسى، ازەربايجان – قازاقستان پارلامەنتارالىق بايلانىستارى جونىندەگى جۇمىس توبىنىڭ مۇشەسى گانيرا پاشايەۆا، شەتەلدىك عالىمدار، ازەربايجاننان كەلگەن دەلەگاسيا مۇشەلەرى، وقۋ ورداسىنىڭ وقىتۋشى-پروفەسسورلار قۇرامى قاتىستى.
كىتاپتىڭ تۇساۋكەسەر راسىمىندە ۋنيۆەرسيتەت باسشىسى جانسەيىت تۇيمەبايەۆ ءمىر جالەل پاشايەۆتىڭ شىعارماشىلىق جولىنا توقتالدى.
«ازەربايجان ادەبيەتىنىڭ تۇركى الەمىندە الاتىن ورنى ەرەكشە. جازۋشى ءمىر جالەل پاشايەۆ 30 جاسىندا «جىگىت مانيفەسى» اتتى ايگىلى تۋىندىسىمەن ەرەكشە تانىلدى. قالامگەردىڭ بۇدان باسقا «تىرىلگەندەر»، «قايدا بارامىز؟»، «اشىق كىتاپ»، «مەنىڭ قۇرداستارىم»، «جاڭا قالا»، «ار سوتى»، «ار ازابى»، «جاسىرىناتىن دوستار» رومان، حيكاياتتارى كەڭ تاراعان. ءمىر جالەل پاشايەۆ ادەبي شىعارماشىلىقپەن قاتار عىلىمي-پەداگوگيكالىق سالادا ەلەۋلى جەتىستىكتەرگە جەتكەن عالىم.
پەداگوگيكا، لينگۆيستيكا، ادەبيەتتانۋ سالالارى بويىنشا عىلىمي ەڭبەكتەر جازدى. تۇركى الەمىنە ورتاق قالامگەردىڭ شىعارمالارىنىڭ قازاق تىلىندە جارىق كورۋى – باۋىرلاس، تۋىس ەلدەردىڭ ادەبي، رۋحاني بايلانىسىنىڭ ايقىن كورىنىسى»، - دەدى رەكتور.
«تاۋلاردىڭ جۇرەگى» اتتى كىتاپ «قازاق ۋنيۆەرسيتەتى» باسپا ءۇيى باسپاحاناسىندا باسىلىپ شىقتى. تۋىندىنى قازاق ادەبيەتىنىڭ اقىن-جازۋشىلارى اتاپ ايتقاندا نۇرعالي وراز، نۇرجان قۋانتاي ۇلى، سايات قامشىگەر، كۇننۇر ايتبايەۆا قازاق تىلىنە اۋداردى. جاۋاپتى رەداكتورى كادىربەك قۇنىپيا ۇلى. كىتاپتى بەزەندىرگەن حاليادا تۇرسىمبەكوۆا.
ءوز كەزەگىندە ازەربايجان رەسپۋبليكاسى ۇلتتىق ءماجىلىسى مادەنيەت كوميتەتىنىڭ ءتوراعاسى گانيرا پاشايەۆا ءسوز سويلەپ، ريزاشىلىعىن ءبىلدىردى.
«قازاقستان مەن ازەربايجان اراسىنداعى قارىم-قاتىناس كۇن ساناپ ارتىپ كەلەدى. بۇگىنگى باستاما ەكى ەلدىڭ مادەنيەتى مەن ادەبيەتىنىڭ دامۋىنا سەپتىگىن تيگىزەتىنى انىق. قازاقستان مەن ازەربايجاننىڭ ادەت-عۇرپى، ءتىلى جانە ءدىنى وتە ۇقساس. ءمىر جالەل ءالي پاشايەۆتىڭ كىتابىن قازاق تىلىنە اۋدارعاندارىڭىز ءۇشىن العىسىمدى بىلدىرەمىن.
مەن قازاق تاريحىن زەرتتەدىم. ازەربايجان مەن قازاق زيالى قاۋىم وكىلدەرى وتە تىعىز قارىم-قاتىناستا بولعانىن ءبىلدىم. قازاق حالقى كوپتەگەن قايعىلى وقيعالاردى باستان كەشىردى. وسى تۇرعىدا ازەربايجاننىڭ حالقى قازاقتىڭ تاريحىن ءبىلسىن دەگەن ماقساتتا «باۋىرلاس ەل – قازاقستان» اتتى كىتاپ جازىپ شىقتىم. وسىنداي رۋحاني بايلانىستار ارقىلى ىنتىماعىمىز ارتا بەرسىن.»، - دەدى گانيرا پاشايەۆا.
