ۇتىس ويىندارىندا كەلەسى جۇلدەلەر ويناتىلدى:
- 100 ءبىلىم الۋشىعا 1 جىلدىق وقۋ اقىسىنا 5% جەڭىلدىك؛
- 50 ءبىلىم الۋشى 20 000 تەڭگە اقشالاي سىياقى؛
- 50 ءبىلىم الۋشىعا قاپشاعاي جاعاجايىنداعى «ۇستاز» دەمالىس ورىنا جولداما؛
- 60 ءبىلىم الۋشىعا «I teach in English» اعىلشىن ءتىلىنىڭ دايىندىق كۋرسىنا تەگىن سەرتيفيكات؛
- 20 ءبىلىم الۋشىعا «Meloman» دۇكەنىنەن كىتاپ ساتىپ الۋ ءۇشىن 10 000 تەڭگە اقشالاي سىياقى؛
- 100 ءبىلىم الۋشىعا «Abai University» يميدجدىك ونىمدەرى.
2021 جىلدىڭ 16 شىلدە كۇنى ۆاكسينانىڭ ءبىرىنشى كومپونەنتىن 1-15 شىلدە ارالىعىندا العان ءبىلىم الۋشىلار اراسىندا ۇتىستىڭ ءۇش ويىن تۇرىنەن جەڭىمپازداردى انىقتاۋ شاراسى وتكىزىلدى. ۇتىس ويىنىنىڭ ءتيىمدى جانە ءادىل جۇرگىزىلۋىن قامتاماسىز ەتۋ ماقساتىندا ويىن ەرەجەسى بەكىتىلىپ، ارنايى كوميسسيا قۇرىلدى. جەڭىمپازداردى انىقتاۋ ۋنيۆەرسيتەت رەكتورى دارحان ءبىلالوۆتىڭ توراعالىعىمەن قۇرىلعان كوميسسيا مۇشەلەرىنىڭ قاتىسۋىمەن ءوتتى.
جەڭىمپازداردى انىقتاۋ ZOOM پلاتفورماسىندا كەزدەيسوق ساندار گەنەراتورى ءادىسى ارقىلى جۇرگىزىلىپ، ناتيجەسىندە 50 ستۋدەنت قاپشاعايداعى دەمالىس ورنىنا جولداما، 60 ستۋدەنت اعىلشىن كۋرسىنا تەگىن سەرتيفيكات جانە 100 ستۋدەنت ءبىر جىلدىق وقۋ اقىسىنا 5% جەڭىلدىككە يە بولدى.
COVID-19-عا قارسى ۆاكسينانىڭ ءبىرىنشى كومپونەنتىن سالدىرىپ، ۇتىس ويىندارىنىڭ جەڭىمپازدارى اتانعان ستۋدەنتتەر 2021 جىلدىڭ 22-24 شىلدە ارالىعىندا قاپشاعاي جاعاجايىنداعى «ۇستاز» دەمالىس ورنىنا ءۇش كۇندىك دەمالىسقا بارىپ قايتتى. دەمالىس ورنىنا بارعان ستۋدەنتتەر ءتورت مەزگىل تاماقتانىپ، سۋعا شومىلىپ، دەمالىستارىن بارىنشا قىزىقتى وتكىزۋگە تىرىستى. ءۇش كۇنگە سوزىلعان جاعاجايداعى دەمالىس، ستۋدەنتتەرگە كوتەرىڭكى كوڭىل-كۇي سىيلادى.
جەڭىمپاز ستۋدەنتتەرگە ۋنيۆەرسيتەت رەكتورىنىڭ ارنايى سەرتيفيكاتتارى تابىستالدى. دەمالىسقا مۇمكىندىك العان ستۋدەنتتەر رەكتور دارحان ءبىلالوۆقا جانە ۋنيۆەرسيتەت اكىمشىلىگىنە ريزاشىلىعىن ءبىلدىردى.
ۋنيۆەرسيتەت ءبىلىم الۋشىلارى اراسىندا ۆاكسينا ەكتىرۋدى ءتيىمدى ۇيىمداستىرۋ جانە ولاردى ۆاكسينا الۋعا ىنتالاندىرۋ ماقساتىنداعى يگى شارا ءوز جالعاسىن تابادى.
