جامبىل وبلىسىندا "قازپوشتا" اق عيماراتىنىڭ شاتىرى قۇلاپ، مۇگەدەك بولىپ قالعان ايەلگە كومپانيا 18،5 ميلليون تەڭگە وتەماقى تولەيتىن بولدى، دەپ حابارلايدى Dalanews.kz.
2023 جىلدىڭ كوكتەمىندە جامبىل اۋدانى، اسا اۋىلىندا قاتتى جەل "قازپوشتا" اق فيليالى عيماراتىنىڭ شاتىرىن ۇشىرىپ اكەتىپ، ول ايەلدىڭ ۇستىنە قۇلاعان.
شۇعىل تۇردە رەانيماسياعا جەتكىزىلگەن ايەلدىڭ ميى شايقالىپ، كەۋدەسى مەن جۇلىنى زاقىمدالىپ، 3-4 ومىرتقاسى سىنعان. سودان كەيىن 1 توپتاعى مۇگەدەكتىك ساناتى بەرىلگەن.
قازپوشتانىڭ جامبىلداعى فيليالى جابىرلەنۋشىگە 7 ملن تەڭگە كومەك كورسەتكەنىمەن، ول قاراجات شەتەلدە ەمدەلۋگە جەتپەگەن.
سول سەبەپتى جابىرلەنۋشى سوتقا جۇگىنۋگە ءماجبۇر بولعان.
سوتتا اق وكىلى تالاپ قويۋدى مويىندامادى، 2021-2022 جىلدارى اق-مەن شاتىرعا جوندەۋ جۇرگىزىلگەنىن، ءبىراق ارحيۆتەن جوندەۋ جۇمىستارىنا قاتىستى قۇجاتتار تابىلماعانىن، سايكەسىنشە شاتىردى اۋىستىرعان مەردىگەردى انىقتاۋ مۇمكىن بولماعانىن ايتىپ تۇسىندىرگەن. سوتتا شاتىردىڭ قۇلاۋى مەردىگەر ساپاسىز ورىنداعان جوندەۋ جۇمىستارىنىڭ سالدارىنان ونىڭ جەتكىلىكسىز نىعايتىلماعانىنا بايلانىستى بولعاندىعى انىقتالدى، – دەلىنگەن سوت حابارلاماسىندا.
سوت مەكەمە وبەكتىنىڭ قاۋىپسىزدىگى مەن پايدالانۋىنىڭ ءتيىستى دەڭگەيىن قامتاماسىز ەتپەدى دەگەن قورىتىندىعا كەلدى، سەبەبى اق عيماراتتى كۇتىپ ۇستاۋعا جانە شاتىردىڭ كۇردەلى جوندەۋ جۇمىستارىن باقىلاۋعا جاۋاپتى بولىپ ەسەپتەلەدى. وسىنى ەسكەرە وتىرىپ، تالاپ ءىشىنارا قاناعاتتاندىرىلدى: اق-دان 8،5 ملن تەڭگە ماتەريالدىق زالالدىڭ وتەماقىسى جانە 10 ملن تەڭگە مورالدىق زيان ءوندىرىلدى.
شەشىم زاڭدى كۇشىنە ەنگەن جوق.
