"قازپوشتا" اق باسقارماسىنىڭ ءتوراعاسى اسەل جاناسوۆا ءوزىنىڭ جالاقىسى قانشا ەكەنىن ايتتى. بۇل تۋرالى ول "پوشتا تۋرالى" زاڭعا ەنگىزىلگەن تۇزەتۋلەر مەن وزگەرىستەر ماقۇلدانعاننان كەيىن ءماجىلىس دالىزىندە جۋرناليستەرگە بەرگەن سۇقباتىندا ايتتى، دەپ جازادى Dalanews.kz.
ول قولىنا تازا تيەتىنى - 1،2 ملن تەڭگە ەكەنىن ايتتى.
ال ەلىمىزدە پوشتاشىلار ورتا ەسەپپەن 160 مىڭ تەڭگە ايلىق الادى. ال شالعاي اۋىلداردا، ءتىپتى ودان دا از. مۇنىڭ سەبەبىن اسەل جاناسوۆا بىلاي ءتۇسىندىردى:
"پوشتا دەگەندە، بۇل تەك پوشتاشىلار عانا ەمەس. بىزدە جۇرگىزۋشىلەر، سۇرىپتاۋشىلار، وپەراتورلار دا جۇمىس ىستەيدى. ولاردىڭ جالاقىلارى ءارتۇرلى. پوشتاشىلارى جارتىلاي ستاۆكادا جۇمىس ىستەيتىن ايماقتار بار. ولار قوسىمشا جۇمىس ىستەۋ مۇمكىندىگىنە يە. مىسالى، سۇرىپتاۋشى تۇندە ءۇشىنشى اۋىسىمعا جۇمىسقا شىعادى دەلىك. ول ءبىر ايلىق جالاقىنىڭ ۇشتەن ءبىر بولىگىن الادى. وسى جاعىنان العاندا، بىزدەگىلەر از جالاقى الاتىن سياقتى كورىنەدى، ءبىراق ءىس جۇزىندە ونىڭ ءۇش-تورت جۇمىسى بولادى"، - دەدى اسەل جاناسوۆا.
ول ۇيىمنىڭ جىل سايىن جالاقىنى كوتەرىپ وتىراتىنىن باسا اتاپ ءوتتى.
2023 جىلى اۋىلدىق وندىرىستىك پەرسونالداردىڭ جالاقىسى 25% - عا كوتەرىلگەن. بيىل تاعى 15%-عا وسكەن. نەگىزىنەن پوشتادا ايەل ادامدار جۇمىس ىستەيدى، شامامەن - 85%. 2022 جىلى وڭىرلەردەگى پوشتاشىلاردىڭ ورتاشا ايلىعى 90 مىڭ تەڭگە بولعان.
