الەۋمەتتىك جەلىدە بەلگىسىز ايەلدىڭ قۇقىق قورعاۋ ورگانى عيماراتىنىڭ كۇزەتىندە تۇرعان پوليسەيگە ايقايلاپ، بىرنەشە زاڭ نورماسىن ورەسكەل بۇزعان ۆيدەوسى تارادى، دەپ حابارلايدى Dalanews.kz.
ۆيدەودان ونىڭ كۇزەت قىزمەتكەرىنە ءتىل تيگىزىپ قانا قويماي، قازاقستان مەملەكەتى، قازاق ءتىلى، پرەزيدەنت پەن پوليسيا قىزمەتى تۋرالى اۋىر ءارى قورلاپ سويلەۋگە دەيىن بارعانى بايقالادى.
كادرلاردا ايەل قۇقىق قورعاۋ مەكەمەسىنىڭ ىشىنە كىرۋگە تالپىنىپ، پوليسەيمەن جانجالداسىپ تۇرعان ءساتى كورىنەدى. اڭگىمە بارىسىندا كۇزەت قىزمەتكەرى ونىڭ ارەكەتىن قازاق تىلىندە باسشىلىققا جەتكىزگەن بولۋى مۇمكىن.
«قازاق مەنى قازاقشا تۇسىنبەيدى دەپ باسشىسىنا مەنى “شۋ كوتەرۋدە” دەپ ايتتى. مەن ءوز قۇقىعىمدى قورعاپ تۇرمىن! ماسىل مەملەكەت! سەنىڭ توقايەۆىڭ ماعان ازاپتاۋ كامەراسىنان ۆيدەو بەرگىزبەي وتىر. ءتۇسىندىڭ بە؟ مەن ساعان ايتىپ تۇرمىن – مەنىڭ وزگە ۇلت ەكەنىمدى بىلە تۇرا قازاقشا سويلەپ كورشى. كور دە تۇر، مەن سەنى سوتقا بەرەمىن! سەن وسى جەردە جالاقى الىپ وتىرۋىڭ ءۇشىن مەن سالىق تولەپ وتىرمىن، ۇقتىڭ با؟ كەرەك بولسا، قازاق ءتىلىن سەنەن ارتىق تۇسىنەمىن. باسىندىرىپ بىتتىڭدەر! وزگە ۇلت وكىلىنە قۇرمەت جوق. ءبارىڭ سەپاراتيستىڭدەر!» – دەيدى ول.
بۇل سوزدەرىن ايەلدىڭ ءوزى ۆيدەوعا ءتۇسىرىپ، جاريالاعان. الايدا قوعامدا بۇل ارەكەت ۇلكەن سىنعا ۇشىرادى. كوپشىلىك ونى زاڭعا قايشى، مەملەكەتكە جانە مەملەكەتتىك ءتىلدى قورلايتىن مالىمدەمە جاسادى دەپ ەسەپتەپ، جاۋاپقا تارتۋدى تالاپ ەتىپ جاتىر.
جەلى قولدانۋشىلارى مۇنداي ارەكەتتەرگە جول بەرۋگە بولمايتىنىن، اسىرەسە ەتنوسارالىق كەلىسىم مەن مەملەكەتتىك رامىزدەرگە قۇرمەت سىندى قۇندىلىقتار ساقتالۋى ءتيىس ەكەنىن ەسكەرتۋدە.
