قمگ اكسيالاردى AIX بيرجاسىنا ساۋدا-ساتتىققا جىبەرۋگە ءوتىنىم بەرمەك. "ۇسىنىس شەڭبەرىندە 90،42% اكسيالارعا يەلىك ەتەتىن قور ينۆەستورلاردىڭ كەڭ اۋقىمىنا، قازاقستان ازاماتتارىنا باسىمدىق بەرە وتىرىپ، 30 505 974 اكسياعا دەيىن ساتىپ الۋدى ۇسىنۋعا نيەتتى. بۇل بارلىق اكسيالاردىڭ جالپى سانىنىڭ شامامەن 5%-ىن قۇرايدى. قالعان اكسيالار قازىرگى ۋاقىتتا قازاقستان ۇلتتىق بانكىنە تيەسىلى"، - دەپ مالىمدەدى، «سامۇرىق-قازىنا» ۇلتتىق ءال-اۋقات قورىنىڭ باسقارما ءتوراعاسى الماسادام ساتقالييەۆ.
«وسىلايشا IPO-نىڭ ناتيجەلەرى بويىنشا قور كەم دەگەندە 85% اكسيالارعا يەلىك ەتۋدى جالعاستىرادى. ۇسىنىستىڭ شەڭبەرىندە ءبىر اكسيانىڭ باعاسى شامامەن 5،1 تريلليون تەڭگە مولشەرىندە كاپيتالداندىرۋدى بولجاي وتىرىپ، ءبىر اكسيا ءۇشىن 8 406 تەڭگەنى قۇرايدى. ينۆەستورلاردىڭ وتىنىمدەرىن قابىلداۋ 2022 جىلدىڭ 9 قاراشاسىندا باستالىپ، ينستيتۋسيونالدىق ينۆەستورلار ءۇشىن 2022 جىلدىڭ 30 قاراشاسىندا، ال بولشەك ينۆەستورلار ءۇشىن 2022 جىلدىڭ 2 جەلتوقسانىندا اياقتالادى»
"قمگ جەتەكشى مۇناي-گاز كومپانياسى جانە قازاقستانداعى ۇلتتىق كومپانيالار اراسىنداعى ەڭ ءىرى كومپانيا. ول كومىرسۋتەكتەردى بارلاۋ مەن وندىرۋدەن باستاپ تاسىمالداۋعا، وڭدەۋگە جانە سەرۆيستىك قىزمەتتەر كورسەتۋگە دەيىنگى بارلىق وندىرىستىك سيكل بويىنشا اكتيۆتەردى باسقارادى، سونداي-اق مۇناي-گاز سالاسىنداعى مەملەكەتتىك ساياساتتى ازىرلەۋگە جانە ىسكە اسىرۋعا قاتىسادى"، - دەدى، ۇلتتىق كومپانيا باسشىسى ماعزۇم مىرزاعالييەۆ.
ونىڭ ايتۋىنشا، كومپانيا ەلدەگى مۇناي مەن گاز كوندەنساتىن وندىرۋدە 25% ، تاسىمالداۋدا 56% جانە مۇناي وڭدەۋدە 82%-دى قامتيدى. ءبىزدىڭ شوعىرلاندىرىلعان اكتيۆتەرىمىز 15 تريلليون تەڭگەدەن استى. بيىل قمگ-نىڭ قۇرىلعانىنا 20 جىل تولدى. ءقازىردىڭ وزىندە كومپانيا كورپوراتيۆتىك باسقارۋ مەن اشىقتىقتىڭ ەڭ جوعارى ستاندارتتارىنا سايكەسەدى، ءوزىنىڭ ەۋرووبليگاسيالارىنىڭ شىعارىلىمدارى ارقىلى حالىقارالىق جانە قازاقستاندىق باعالى قاعازدار نارىقتارىندا كەڭىنەن تانىمال، بارلىق ءۇش جەتەكشى حالىقارالىق رەيتينگتىك اگەنتتىكتەردىڭ حالىقارالىق كرەديتتىك رەيتينگتەرى بار، ولاردىڭ ەكەۋى ينۆەستيسيالىق دەڭگەيدەگى رەيتينگ.
"ۇكىمەت پەن قوردىڭ قمگ اكسيالارىنىڭ ءبىر بولىگىن ەركىن نارىقتا ساتۋ تۋرالى شەشىمى الەۋەتتى ينۆەستورلارعا كومپانيانىڭ اكسيالارىن ساتىپ الۋعا مۇمكىندىك بەرەدى، قازاقستانداعى باعالى قاعازدار جانە قور بيرجالارى نارىعىنىڭ دامۋىنا ىقپال ەتەتىن بولادى. بۇل رەتتە كومپانيانى باقىلاۋ قور ارقىلى مەملەكەتتە قالاتىنىن اتاپ وتەمىن. ءبىز ءوز تاراپىمىزدان قمگ كومپانياسى ينۆەستورلارىمىز ءۇشىن تارتىمدى بولۋى جانە ولاردىڭ ينۆەستيسيالىق پورتفەلدەرىندە لايىقتى ورىن الۋى ءۇشىن بار كۇشىمىزدى سالامىز"
جوسپارلانعان ۇسىنىستىڭ نەگىزگى اسپەكتىلەرىن راستاۋ
- قمگ-دا جوسپارلانىپ وتىرعان IPO قازاقستان رەسپۋبليكاسىنىڭ ۇكىمەتى بەكىتكەن جەكەشەلەندىرۋدىڭ 2021-2025 جىلدارعا ارنالعان كەشەندى جوسپارىن ىسكە اسىرۋ اياسىندا وتكىزىلەدى.
- قور AIX جانە KASE قاعيدالارى مەن ەرەجەلەرىنە سايكەس قازاقستاندىق جانە حالىقارالىق بولشەك جانە ينستيتۋسيونالدىق ينۆەستورلارعا AIX قازاقستاندىق الاڭدارىندا جانە قازاقستاندىق قور بيرجاسىندا (بۇدان ءارى – «KASE») اكسيالار ۇسىنۋعا نيەتتى.
- قازىرگى ۋاقىتتا قورعا قمگ-نىڭ بارلىق شىعارىلعان جانە ورنالاستىرىلعان جاي اكسيالارىنىڭ 90،42%-ى تيەسىلى. ۇسىنىس شەڭبەرىندە قور 30 505 974 اكسيانى ساتۋعا ۇسىنۋعا نيەتتى، بۇل شىعارىلعان جانە ورنالاستىرىلعان اكسيالاردىڭ جالپى سانىنىڭ 5%-نا دەيىنگىنى (610 119 493 دانا كولەمىندە) قۇرايدى. IPO وتكىزىلگەننەن كەيىن قور اكسيالاردىڭ جالپى سانىنىڭ كەمىندە 85%-نا يەلىك ەتەدى.
- قمگ ۇسىنىس شەڭبەرىندە جاڭا اكسيالاردى ورنالاستىرۋدى (ساتۋدى) جوسپارلامايدى جانە IPO-نىڭ ناتيجەسىندە قور اكسيالاردى ساتۋدان اقشالاي قاراجات المايدى.
- ۇسىنىس ماقساتتارى ءۇشىن ءبىر اكسيانىڭ باعاسى شامامەن 5،1 تريلليون تەڭگە مولشەرىندە كاپيتالداندىرۋدى بولجاي وتىرىپ، 8 406 تەڭگەنى قۇرايدى.
- اكسيالاردى «KMG» ساۋدا كودى (تيكەرى) بار AIXء-تىڭ رەسمي تىزىمىنە ەنگىزۋ 2022 جىلعى 7 جەلتوقساندا كۇتىلەدى، ال AIX-تە ساۋدا-ساتتىققا رۇقسات 2022 جىلعى 8 جەلتوقساننان باستاپ كۇتىلەدى.
- قمگ-نىڭ جاي اكسيالارى «KMGZ» ساۋدا كودى بار KASE ليستينگىنە ەنگىزىلگەن.
- قمگ-نىڭ اعىمداعى اكسيونەرلەرى – قازاقستان رەسپۋبليكاسىنىڭ قورى مەن ۇلتتىق بانكى ءۇشىن IPO وتكىزىلگەننەن كەيىن – اكسيالاردى ساتۋعا نەمەسە وزگە دە يەلىكتەن شىعارۋعا 180 كۇندىك تىيىم سالىناتىن بولادى (ءاربىر جاعدايدا بەلگىلى ءبىر جالپى قابىلدانعان ەرەكشەلىكتەرمەن).
- ينۆەستورلاردىڭ وتىنىمدەرىن قابىلداۋ 2022 جىلعى 9 قاراشادا (استانا ق.) ۋاقىتى بويىنشا ساعات 12:00-دە باستالادى جانە ينستيتۋسيونالدىق ينۆەستورلار ءۇشىن 2022 جىلعى 30 قاراشادا ساعات 18:00-دە، ال بولشەك ينۆەستورلار ءۇشىن 2022 جىلعى 2 جەلتوقساندا (استانا ق.) ۋاقىتى بويىنشا ساعات 15:00-دە اياقتالادى.
- قمگ جانە قور وكىلدەرىنىڭ قاتىسۋىمەن روۋدشوۋدى 2022 جىلعى 9 قاراشادان باستاپ نەمەسە وسى كۇنگە جاقىن ۋاقىتتا وتكىزۋ جوسپارلانۋدا.
- ۇسىنىستىڭ بىرلەسكەن ۇيلەستىرۋشىلەرى مەن بۋكراننەرلەرى «BCC Invest» اق، «فريدوم فينانس» اق، «Halyk Finance» اق جانە «SkyBridge Invest» اق.
- قمگ ۇسىنىستىڭ ماقساتىندا 2022 جىلى 7 قاراشا AIX ماقۇلداعان پروسپەكتىنى اعىلشىن تىلىندە ازىرلەدى. قمگ پروسپەكتىنى قازاق جانە ورىس تىلدەرىنە اۋداردى. كەز كەلگەن كۇمان تۋىنداعان جاعدايدا، اعىلشىن تىلىندەگى پروسپەكتىنىڭ نۇسقاسىن باسشىلىققا الۋ كەرەك. پروسپەكت اعىلشىن، قازاق جانە ورىس تىلدەرىندە قمگ-نىڭ (www.kmg.kz) جانە قوردىڭ (www.sk.kz) ۆەب-سايتتارىندا تانىسۋ ءۇشىن قولجەتىمدى.
