قمگ باسپا ءسوز قىزمەتىنىڭ مالىمەتىنشە، 2025 جىلدىڭ 4 ايدىڭ قورىتىندىسى بويىنشا قاشاعان كەن ورنىندا قمگ ۇلەسىن قوسقاندا 6 ملن 118 مىڭ توننا مۇناي ءوندىرىلدى. 2025 جىلعا جوسپارلانعان ءوندىرۋ كولەمى 17،8 ملن توننانى قۇرايدى. ماسەلەن، 2024 جىلى بۇل كەن ورنىنان 17،4 ملن توننا مۇناي وندىرىلسە، 2023 جىلى بۇل كولەم 18،8 ملن توننانى، 2022 جىلى — 12،7 ملن توننانى قۇرادى. 2024 جىلدىڭ سوڭىندا NCOC 2025-2026 جىلدارى ىسكە اسىرىلماق قاشاعانداعى تاۋلىگىنە وندىرەلەتىن مۇناي كولەمىن 370 مىڭ باررەلدەن 450 مىڭ باررەلگە (57،24 مىڭ توننا) دەيىن ۇلعايتۋدى قاراستىراتىن جوبانى ۇسىندى. كەلىسىمشارت 2041 جىلعا دەيىن جارامدى.

ءوز كەزىندە حاسەنوۆ كەن ورنىنىڭ زور الەۋەتىن ەسكەرە وتىرىپ، جوبانىڭ بارلىق قاتىسۋشىلارىن ەلىشىلىك قۇندىلىقتى دامىتۋعا جانە قازاقستاندىق قامتۋ ۇلەسىن ارتتىرۋعا باسا نازار اۋدارا وتىرىپ، قاشاعاندى تولىق يگەرۋ جوسپارىن ورىنداۋدىڭ ماڭىزىن اتاپ ءوتتى.

قاراشىعاناق كەن ورنىندا قازمۇنايگاز ۇلەسىن قوسا العاندا، ءوندىرۋ كولەمى 2025 جىلعى 4 ايدا 3،8 ملن توننا مۇنايدى قۇراپ، جوسپار اسىرا ورىندالدى. بيىل قاراشىعاناقتا 11،14 ملن توننا مۇناي جانە 25،57 ملرد تەكشە مەتر گاز ءوندىرۋ جوسپارلانعان. قمگ قاراشىعاناق جوباسىنداعى سەرىكتەس رەتىندە وسى كەن ورنىندا قۋاتى جىلىنا 4،5 ملرد تەكشە مەتر بولاتىن گاز وڭدەۋ زاۋىتىنىڭ قۇرىلىسى بويىنشا وڭ ديناميكانىڭ جوقتىعىنا الاڭداۋشىلىق ءبىلدىردى.

تاراپتار قازاقستاندىق كادرلاردىڭ بىلىكتىلىگىن ارتتىرۋ جانە دامىتۋ ماسەلەلەرىن، اتاپ ايتقاندا قازمۇنايگاز ماماندارىن "قاراشىعاناق پەترولەۋم وپەرەيتينگ ب.ۆ." كومپانياسىنا جىبەرۋدى قاراستىردى.

سونىمەن قاتار كەزدەسۋدە جەر قويناۋىن گەولوگيالىق زەرتتەۋ بويىنشا ىنتىماقتاستىق ورناتۋ ماسەلەسى ءسوز بولدى. قازمۇنايگاز گەولوگيالىق بارلاۋ جوبالارىنا ينۆەستيسيا تارتۋ ماقساتىندا 2024 جىلى جاھاندىق روۋد-شوۋ وتكىزدى. ءوز كەزەگىندە Shell بىرنەشە پەرسپەكتيۆالى ۋچاسكەگە قىزىعۋشىلىق تانىتتى.

كومپانيالار اراسىندا ورتاق گەولوگيالىق بارلاۋ جۇمىستارىن جوسپارلاۋ ءۇشىن سەيسميكالىق زەرتتەۋلەردىڭ ناتيجەسىن ءتيىمدى پايدالانۋعا مۇمكىندىك بەرەتىن كەلىسىم جاسالدى. اتاپ ايتقاندا، قازىرگى ۋاقىتتا Shell اقتوبە وبلىسىندا ورنالاسقان "مۇعالجار" جوباسىنىڭ الەۋەتىن بىرلەسىپ زەرتتەۋگە قاتىسىپ جاتىر.

"قازمۇنايگاز قازاقستانداعى بىرلەسكەن ينۆەستيسيالىق جوبالاردى قوسا العاندا، ءوزارا ءىس-قيمىلدىڭ جاڭا فورماتتارىنا ءارقاشان اشىق. ءبىز ۇزاق مەرزىمدى ستراتەگيامىزدى ىسكە اسىرۋ اياسىندا Shell كومپانياسىن باسىم سەرىكتەس رەتىندە قاراستىرامىز"، - دەدى اسحات حاسەنوۆ.

بۇعان دەيىن سايتىمىزدا "الەمدىك نارىقتا مۇناي باعاسى قۇلدىراۋدا: قمگ ەش ساسپايتىنىن ايتتى" دەگەن ماقالا جاريالانعان بولاتىن.