قازىناشىلىق كوميتەتىنەن 70 راسىمدىك بۇزۋشىلىق پەن 15 جۇيەلى كەمشىلىك انىقتالدى. سالدارىنان بيۋدجەتتىڭ ىقتيمال شىعىندارى 124 ملرد تەڭگەدەن استى، دەپ حابارلايدى Dalanews.kz.
قازىناشىلىق كوميتەتىنىڭ قىزمەتىنە اۋديت جۇرگىزگەن جوعارى اۋديتورلىق پالاتا وسىنداي قورىتىندىعا كەلىپ وتىر.
"قازىناشىلىق كوميتەتى بيۋدجەت كودەكسىنىڭ نورمالارىن بۇزا وتىرىپ، 2021-2023 جىلداردىڭ جەكەلەگەن ايلارىندا ەميسسيالىق باعالى قاعازداردى باستاپقىدا جوسپارلانعان كولەمنەن ارتىق شىعارعان. ال رەسپۋبليكالىق بيۋدجەتتىڭ قولما-قول اقشانى باقىلاۋ شوتىنداعى قاراجات قالدىعىنىڭ بولجامى وڭ بولعان. بۇل 124 ملرد تەڭگەدەن استام بيۋدجەتتىڭ ىقتيمال شىعىندارىنا اكەلدى"، دەلىنگەن جاپ باسپا ءسوز قىزمەتىنىڭ 3 جەلتوقساندا تاراتقان حابارلاماسىندا.
ماسەلەن، قازىناشىلىق ورگاندارىنىڭ اعىمداعى باقىلاۋى راستايتىن قۇجاتتىڭ بار-جوعى تۇرعىسىنان عانا جۇرگىزىلەدى. بۇل جەردە ونىڭ زاڭنامادا بەلگىلەنگەن نىسانعا سايكەستىگى، سونداي-اق اۆتورلىق جانە تەحنيكالىق قاداعالاۋلاردى راستاۋ تۋرالى بەلگىنىڭ بار-جوعى تەكسەرىلمەيدى.
مىسالى، الماتى قالاسىنىڭ قازىناشىلىق دەپارتامەنتى اكىمشىلىك عيماراتتاردىڭ ءبىرىن رەكونسترۋكسيالاۋ شەڭبەرىندە 2،5 ملرد تەڭگەنى قۇرايتىن ورىندالعان جۇمىستاردىڭ قۇنى تۋرالى سول ءبىر انىقتاما بويىنشا جالپى سوماسى 3،7 ملرد تەڭگەگە ەكى رەت تولەم جۇرگىزگەن. مۇنداي جاعدايلار بىرنەشە رەت قايتالانعان.
سونىمەن قاتار جوعارى اۋديتورلىق پالاتا ءتوراعاسى اۆانستىق تولەمدەرگە بايلانىستى ماسەلەلەرگە نازار اۋداردى. ماسەلەن، اۋماقتىق قازىناشىلىق ورگاندارى بيۋدجەت زاڭناماسىنىڭ نورمالارىن بۇزا وتىرىپ، وتكەن جىلدارداعى اۆانستىڭ وتەلمەگەن سوماسى بولا تۇرا، سونداي-اق بۇرىن تولەنگەن اۆانستاردى پروپورسيونالدى ۇستاپ قالماي، جاڭا اۆانستاردى تولەۋگە بەرىلگەن شوتتاردى ورىنداعان.
ءاليحان سمايىلوۆ بيۋدجەت زاڭناماسىنىڭ تالاپتارىن بۇزاتىن تولەمدەردى جۇرگىزۋ مۇمكىندىگىن اۆتوماتتى تۇردە بۇعاتتاۋ ءۇشىن ورتالىق قازىناشىلىق اپپاراتى قولدانىستاعى اقپاراتتىق جۇيەنى پىسىقتاۋى قاجەت ەكەنىن اتاپ ءوتتى.
سونىمەن قاتار ءبىرقاتار سەبەپ بويىنشا بيۋدجەت قاراجاتىنىڭ ماقساتقا ساي پايدالانىلۋىن، مەملەكەتتىك جوبالارعا قاتىسۋشىلاردىڭ سالىقتار مەن بيۋدجەتكە تولەنەتىن باسقا دا تولەمدەردى تولەۋ تولىقتىعىن باقىلاۋدى ءاردايىم قامتاماسىز ەتە المايتىن قازىناشىلىق سۇيەمەلدەۋ جۇيەسىنە دە قاتىستى كوپتەگەن سۇراق تۋىندادى.
"ماسەلەن، جوبالاردى قازىناشىلىق سۇيەمەلدەۋ شەڭبەرىندە قوسالقى مەردىگەرلەر ءۇشىن مەملەكەتتىك ساتىپ الۋ شوتتارىن اشۋ مەملەكەتتىك كىرىستەر ورگاندارى جۇرگىزگەن تاۋەكەلدەردى تالداۋ ناتيجەلەرىن ۇنەمى ەسكەرە بەرمەيلى. بۇل جوبالارعا جوسىقسىز قوسالقى مەردىگەرلەردىڭ قاتىسۋىنا اكەپ سوعۋى مۇمكىن. سونىمەن قاتار مەملەكەتتىك ساتىپ الۋ شوتتارىنان تولەمدەردى اقشانى تۇپكىلىكتى الۋشىلاردىڭ بانك شوتتارىنا اۋدارۋدى اۋماقتىق قازىناشىلىق ورگاندارى ولاردىڭ تاۋارلاردى، جۇمىستى نەمەسە كورسەتىلەتىن قىزمەتتەردى ءوندىرۋشى مارتەبەسىن راستاماي جۇزەگە اسىرعان"، دەلىنگەن قورىتىندى قۇجاتتا.
بەيىندى مەملەكەتتىك ورگاندار دا قازىناشىلىق سۇيەمەلدەۋدى ەنگىزۋ ماقساتتارىنا قول جەتكىزۋگە مونيتورينگ پەن تالداۋ جۇرگىزبەيدى.
جالپى، جۇرگىزىلگەن مەملەكەتتىك اۋديت ناتيجەلەرى بويىنشا:
- 70 راسىمدىك بۇزۋشىلىق جانە 15 جۇيەلى كەمشىلىك انىقتالدى؛
- بيۋدجەتتىڭ ىقتيمال شىعىندارى 124 ملرد تەڭگەدەن استى.
جوعارى اۋديتورلىق پالاتا بارلىق انىقتالعان كەمشىلىك پەن بۇزۋشىلىقتى جويۋ ءۇشىن ءتيىستى تاپسىرمالار مەن ۇسىنىمدار بەردى.
بۇل جۇمىس ناتيجەلەرى ەلەكتروندى تۇردە تىركەلە وتىرىپ باقىلاناتىن بولادى.
