قارجىلىق مونيتورينگ اگەنتتىگىنىڭ (قما) الماتى وبلىسى بويىنشا دەپارتامەنتى "قازاتومونەركاسىپ" ۇاك" اق قۇرىلىمىنداعى نەگىزگى كاسىپورىن – گەولوگيالىق جۇمىستار مەن تەحنولوگيالىق بۇرعىلاۋعا جاۋاپتى "ۆولكوۆگەولوگيا" اق-نىڭ بيۋدجەت قاراجاتىن جىمقىرۋ فاكتىسى بويىنشا تەرگەۋدى اياقتادى، دەپ حابارلايدى Dalanews.kz.
كومپانيانىڭ بۇرىنعى باسقارما ءتوراعاسى د.ن. مولداشي ەكى جىل بويى ورىندالعان جۇمىستار بويىنشا جالعان اكتىلەر راسىمدەلەتىن سحەمانى ۇيىمداستىرعان.
"اتالعان قۇجاتتاردا "كازبۋرماش سك" جشس-دەن جەتكىزىلمەگەن قوسالقى بولشەكتەر قابىلدانعانى تۋرالى جالعان مالىمەتتەر كورسەتىلگەن. وسى جالعان اكتىلەر نەگىزىندە كونتراگەنتكە 86 ملن تەڭگەدەن استام سوما اۋدارىلعان. كەيىن بۇل قاراجات زاڭسىز يەمدەلگەن. تەرگەۋ بارىسىندا كۇدىكتىلەر كەلتىرىلگەن ماتەريالدىق شىعىندى تولىق وتەدى. قىلمىستىق ءىس سوت قاراۋىنا جولداندى"، دەلىنگەن قما حابارلاماسىندا.
بۇعان دەيىن وسى ءىس اياسىندا "ۆولكوۆگەولوگيا" اق فيليالىنىڭ ديرەكتورى ا.م. بوراشيەۆ، سونداي-اق "كازبۋرماش سك" ج ش س باسشىسى ە.س. اليپبايەۆ پەن بۋحگالتەر گ.ج. توكاتايەۆا 3 جىلدان 7 جىلعا دەيىن باس بوستاندىقتارىنان ايىرىلعان بولاتىن.
ايتا كەتسەك، كۇنى كەشە مەملەكەت باسشىسى قارجىلىق مونيتورينگ اگەنتتىگىنىڭ ءتوراعاسى جانات ەليمانوۆتى قابىلدادى. قارجىلىق مونيتورينگ اگەنتتىگى 720 قىلمىستىق ءىستى تەرگەۋدى اياقتاپ، 15 ۇيىمداسقان قىلمىستىق توپتى، سونىڭ ىشىندە 3 ترانسۇلتتىق توپتى جويعانى جونىندە اقپارات بەردى.
