Qarjylyq monitoring agenttiginiń (QMA) Almaty oblysy boiynsha departamenti "Qazatomónerkásip" UAK" AQ qurylymyndaǵy negizgi kásiporyn – geologiialyq jumystar men tehnologiialyq burǵylaýǵa jaýapty "Volkovgeologiia" AQ-nyń biýdjet qarajatyn jymqyrý faktisi boiynsha tergeýdi aiaqtady, dep habarlaidy Dalanews.kz.
Kompaniianyń burynǵy basqarma tóraǵasy D.N. Moldashi eki jyl boiy oryndalǵan jumystar boiynsha jalǵan aktiler rásimdeletin shemany uiymdastyrǵan.
"Atalǵan qujattarda "Kazbýrmash SK" JShS-den jetkizilmegen qosalqy bólshekter qabyldanǵany týraly jalǵan málimetter kórsetilgen. Osy jalǵan aktiler negizinde kontragentke 86 mln teńgeden astam soma aýdarylǵan. Keiin bul qarajat zańsyz iemdelgen. Tergeý barysynda kúdiktiler keltirilgen materialdyq shyǵyndy tolyq ótedi. Qylmystyq is sot qaraýyna joldandy", delingen QMA habarlamasynda.
Buǵan deiin osy is aiasynda "Volkovgeologiia" AQ filialynyń direktory A.M. Borashev, sondai-aq "Kazbýrmash SK" JShS basshysy E.S. Alipbaev pen býhgalter G.J. Tokataeva 3 jyldan 7 jylǵa deiin bas bostandyqtarynan aiyrylǵan bolatyn.
Aita ketsek, kúni keshe Memleket basshysy Qarjylyq monitoring agenttiginiń tóraǵasy Janat Elimanovty qabyldady. Qarjylyq monitoring agenttigi 720 qylmystyq isti tergeýdi aiaqtap, 15 uiymdasqan qylmystyq topty, sonyń ishinde 3 transulttyq topty joiǵany jóninde aqparat berdi.
