90-شى جىلداردىڭ قيىن-قىستاۋىندا تالاي جانعا اراشا، بىرەۋگە - قولداۋشى، اعايىن-تۋىسىنا قورعان، وتباسىنا اياۋلى جار، ونەر-مادەنيەت وكىلدەرىنە - ناعىز وكىل اكە بولعانىن ەل بىلەدى. الماتى قالاسى مەن وڭىرلەردىڭ قۇرىلىس جانە ارحيتەكتۋراسىن دامىتۋعا ولشەۋسىز ۇلەس قوستى. قۇرىلىس كومپانياسىنىڭ تىزگىنىن ۇستاي ءجۇرىپ قانشاما قازاق جاستارىن ناعىز ەڭبەككە، ادال ءناپاقا تابۋعا باۋلىدى. اتى دارداي كومپانيالاردىڭ ءبىرقاتارىن تاكەڭنىڭ شەكپەنىنەن شىققان شەبەرلەر باسقارىپ وتىر. ەلىن سۇيگەن اردا ۇلدىڭ قامقورلىعىن كورگەندەر ،،بۇگىنگىنىڭ اتىمتاي جومارتى وسى كىسىدەي-اق بولار،، دەۋشى ەدى. ،،تاماشا،، ويىن-ساۋىق وتاۋى، ،،اققۋ مەن گاككۋ،، تەاترىن جانە وزگە ونەر قىراندارىن قىلاۋسىز كومەگىمەن جارىلقاپ ءجۇردى. ،،كومەك بەرۋ - ءبىر ميسسيام سياقتى. بەرگىم كەپ، الاقانىم قىشىپ تۇرادى،، دەگەندى العاۋسىز ايتاتىن. كوكىرەگى قارس ايىرىلعان قالىڭ ەل - سول جاقسىلىقتارى ءجاننات ەسىكتەرىن اشسىن دەپ بەت سيپاسىپ قالا بەردى…
جارى دۇيسەنكۇل ەكەۋى 7 بالا تاربيەلەپ وسىرگەن ونەگەلى وتباسى. ءاعا-ىنى، قارىنداستارىنىڭ، بۇكىل اۋلەتىنىڭ تىرەۋى دە، تىلەۋشىسى دە ءبىر ءوزى ەدى.
ۇلكەنگە قۇرمەتتى دە، باۋىرمالدىق پەن سىيلاستىقتىڭ ۇلگىسىن دە ەل-جۇرت وسى كىسىنىڭ ىس-ارەكەتىنەن كورەتىن، «قولدان كەلسە ءسويتىپ ىستەگەنگە نە جەتسىن» دەپ شىن پەيىلمەن تىلەپ تۇراتىن.
قايران تاكە!
ءدال بۇلاي، ازا بويدى قازا قىلىپ قان جۇتىپ، جۇرەك سىزداتار ەستەلىك جازىپ وتىرامىز دەپ كىم ويلاعان؟
جانىڭىز ءجاننات تورىنەن جاي تاپسىن!
ارتىندا قالعان ەت جاقىن، تۋعان-تۋىستارىنا قايعىرا كوڭىل ايتامىز.
باقۇل بول، بولمىسى بولەك، جانى جايساڭ جاقسى ادام!
Dalanews.kz – اقپارات اگەنتتىگىنىڭ ۇجىمى
