«رەسەيدەگى ۆاحتا» دەگەن اتپەن حابارلاندىرۋ جاريالاعان قوستانايلىق اگەنتتىك جۇمىس سۇراۋشىلاردىڭ كوپ ەكەنىن ايتادى.
قازاقستاندىقتاردىڭ ماريۋپولگە جۇمىسقا تارتىلىپ جاتقانى تۋرالى العاش جۋرناليست لۇقپان احمەدياروۆ جازدى. «مىڭداعان ءمايىتتىڭ ۇستىنە ءۇي سالىپ جاتقان رەسەيلىكتەرگە جۇمىس ىستەۋ مورالعا قايشى» دەيدى. ونىڭ سوزىنشە، سوعىس ايماعىنا اتتانىپ جاتقان قازاقتارعا ءقاۋىپ ءتونىپ تۇر.
"سونداي ۇلكەن اقشامەن شاقىرىپ، قازاقتاردى جايلاپ-جايلاپ مىنا سوعىسقا قاتىستىرۋ، تارتۋ… ولار، ارينە، ماريۋپولگە بارىپ، اۆتومات ۇستامايدى. ەشقانداي قارۋ ۇستامايدى. قۇرىلىس جۇمىسىمەن اينالىسادى. ءبىراق مارۋپولدە جۇرگەن ۋكراين پارتيزاندارى باياعىدا-اق «رەسەيدەن كەلگەن جاۋىنگەر مەن قۇرىلىسشىلاردى زاڭدى تۇردە نىساناعا الامىز» دەگەن. «قۇرىلىسشىلاردى دا جاۋىنگەر دەپ ەسەپتەيمىز، سولارمەن دە سوعىسامىز» دەگەن" دەدى ۋكرايناداعى قازاق ءجۋرناليسى لۇقپان احمەدياروۆ.
ماريۋپولدەگى قۇرىلىسقا قازاقتاردى تارتىپ جاتقان اگەنتتىك وكىلى 11 قازاقستاندىق بۇگىن، 14 جەلتوقسان كۇنى جولعا شىعاتىنىن جەتكىزدى. ازاتتىق تىلشىسىمەن تەلەفون ارقىلى عانا سويلەسكەن ول «ءبىز تەك جۇمىس تاۋىپ بەرەمىز، قاۋىپسىزدىگىنە رەسەيلىك كومپانيالار جاۋاپتى» دەدى.
ولار تولىققاندى سۇحبات بەرۋگە كەلىسپەدى، داۋسىن پايدالانۋعا، ءاتى-جونىن اتاۋعا دا تىيىم سالدى. جارناما حابارلاندىرۋىنا قاراعاندا، رەسەيلىكتەر شامامەن 900 مىڭ تەڭگە ايلىق تولەۋگە ۋادە بەرگەن.
Masa.media سايتى ماريۋپولگە جۇمىسقا شاقىرعان حابارلاندىرۋلاردى Reكادرو، "كنوپكا" سايتتارىنان دا تاپقان. حابارلاندىرۋ يەلەرى "قالادا تمد، ونىڭ ىشىندە قازاقستاننان دا كەلگەندەر بارىن" ايتقان.
ازاتتىق «وككۋپاسيالانعان قالاعا قازاقتاردىڭ بارۋى قانشالىقتى زاڭدى؟» دەپ ۇلتتىق قاۋىپسىزدىك كوميتەتىنە، باس پروكۋراتۋرا مەن ىشكى ىستەر مينيسترلىگىنە حابارلاستى. ولار بۇل تۋرالى ەستىمەگەنىن ايتتى. قازاقستاننىڭ ۋكرايناداعى ەلشىسى دە «ەلشىلىككە بۇل ماسەلەمەن ەشكىم حابارلاسپاعانىن» جەتكىزدى. حالىقارالىق قۇقىق ساراپشىسى «ماريۋپولگە جۇمىسقا بارۋ — قازاقستان زاڭدارىنا قايشى ەمەس» دەيدى.
— بۇل ازاماتتىق قۇقىققا جاتادى. كەز كەلگەن ازاماتتىڭ ەركىن ءجۇرىپ-تۇرۋ قۇقىعى قولدانىلادى، ادام قۇقىعى تۇرعىسىنان قارار بولساق. ال قازاقستاننىڭمىندەتى — شەتەلدە، ۋكراينا تەرريتورياسىندا جۇرگەن ءوز ازاماتتارىنىڭ باس اماندىعىن قامتاماسىز ەتۋ. ياعني، ولار كەڭەس بەرەدى ۋكرايناعا كەلمەۋگە. ءبىراق كەلمەڭدەر دەپ ايتا المايدى سوعىس كەزەڭى بولسا دا، – دەيدى حالىقارالىق قۇقىق ساراپشىسى ايگەرىم قۇسايىن قىزى.
ءماريۋپولدى رەسەي بيىل مامىردا باسىپ العان. ول – ورىس اسكەرىنىڭ ەڭ اۋىر سوققىسىنا ۇشىراعان قالالاردىڭ ءبىرى. رەسمي كييەۆ دەرەگىنشە، كەمىندە 25 مىڭ ادام وققا ۇشقان. جەتى مىڭعا جۋىق كىسى ءۇيىندى استىندا ولگەن. جۇزدەگەن مىڭ تۇرعىن بوسىپ كەتتى. ۋكراينا پرەزيدەنتى سوزىنشە، باسقىنشىلار شابۋىلىنان ءماريۋپولدىڭ 95 پايىزى قيراپ قالعان. رەسەي بيلىگى شىلدەدە قالانى قالىپقا كەلتىرۋگە كىرىسكەنىن حابارلاعان.
قازاقستان ماريۋپولگە ازاماتتارى اتتانىپ جاتقان ورتالىق ازياداعى جالعىز ەل ەمەس. قازان ايىندا ازاتتىقتىڭ تاجىك قىزمەتى رەسەي باسىپ العان قالاعا تاجىك ميگرانتتارىن اتتاندىرىپ جاتقانىن حابارلاعان. ەكى ايدان سوڭ، جەلتوقساندا ميگرانتتار رەسەيلىك قۇرىلىس كومپانيالارى ۋادە ەتىلگەن ەڭبەكاقىنىڭ جارتىسىن عانا تولەپ جاتقانىنا شاعىنعان.
https://dalanews.kz/del-qazir/84640-25-akademiia-ashylady-huawei-zhanga-qazaqstanga
https://dalanews.kz/news/84675-tomengi-zhalaqyny-anyqtau-preziden
