قازاقستاننىڭ ءتورت وبلىسىندا سۋ تاسقىنىمەن كۇرەس قالاي ءجۇرىپ جاتىر

قاراكوز امانتاي 24 مام. 2024 12:53 49282

قازاقستاننىڭ ءتورت وبلىسىندا سۋ تاسقىنىنا قارسى جۇمىستار جالعاسۋدا، دەپ حابارلايدى Dalanews.kz.

اقتوبە، اتىراۋ، باتىس قازاقستان، سولتۇستىك قازاقستان وبلىستارىندا سۋ تاسقىنىنا قارسى جانە قۇرعاتىلعان ۇيلەر مەن اۋماقتاردا دەزينفەكسيالىق جۇمىستار جۇرگىزىلۋدە.

"وتكەن تاۋلىكتە سولتۇستىك قازاقستان وبلىسىنىڭ پەتروپاۆل قالاسىندا قالعان سۋ باسقان اۋلا اۋماقتارىنان سۋ سورۋ جۇمىستارى جالعاستىرىلۋدا. 128 170 تەكشە مەتر سۋ سورىلدى.

اتىراۋ وبلىسى جىلىوي اۋدانىنىڭ قۇلسارى قالاسىندا، يندەر اۋدانىنىڭ يندەربور كەنتىندە، ماحامبەت اۋدانىنىڭ جالعانساي اۋىلىندا سۋ باسقان اۋماقتاردان 173 179 تەكشە مەتر سۋ سورىلدى. جايىق وزەنىنىڭ سۋ دەڭگەيىنە مونيتورينگ جۇرگىزىلۋدە. 5 400 قاپ جانە 380 توننا ينەرتتى ماتەريالدار توسەلدى. جالعانساي اۋىلىندا قورعانىس بوگەتتەرىن نىعايتۋ جانە سالۋ جۇمىستارى جالعاسۋدا. جالعانساي اۋىلىنىڭ بارلىق ەۆاكۋاسيالانعان تۇرعىندارى ءوز ۇيلەرىنە ورالدى"، - دەلىنگەن حابارلامادا.

ال اقتوبە وبلىسى ىرعىز اۋدانىنىڭ قۇيلىس جانە جايساڭباي اۋىلدارىندا 5 150 قاپشىق پەن 164 توننا ينەرتتى ماتەريال توسەلدى. بوگەتتەردى نىعايتۋ جۇمىستارى جالعاستىرىلۋدا.

"باتىس قازاقستان وبلىسىنىڭ ورال قالاسىندا قۋاتتى جىلجىمالى سورعى ستانسيالارىنىڭ كومەگىمەن ساياجاي ۇيلەرىنەن ەرىگەن قار سۋىن سورۋ جۇمىستارى تاۋلىك بويى جۇرگىزىلۋدە. وتكەن تاۋلىكتە جانە تۇنگى ۋاقىتتا 266 693 تەكشە مەتر سۋ سورىلدى.

رەسپۋبليكا بويىنشا ەۆاكۋاسيالانعان 61 860 ادام ءوز ۇيلەرىنە ورالدى. 5 341 ادام ۋاقىتشا ورنالاسۋ پۋنكتتەرىندە قالۋدا. 24،9 ملن ارتىق ەرىگەن قار سۋى سۋ سورىلدى، 8 ملن ارتىق قاپشىق جانە 1،5 ملن توننا ينەرتتى ماتەريال توسەلدى"، - دەدى تجم.

اۆاريالىق-قۇتقارۋ جانە سۋ تاسقىنىنا قارسى جۇمىستارعا 4 276 ادام، 651 تەحنيكا، 248 سۋ سورۋ قۇرالى جانە 56 ءجۇزۋ قۇرالى، 4 اۋە كەمەسى جۇمىلدىرىلدى.


ۇسىنىلعان
سوڭعى جاڭالىقتار