"اۋعانستانداعى قازاق كونسۋلدىعىنىڭ الدىندا تۇرعانىمىزعا 20 كۇن بولدى" دەپ ازاتتىققا حابارلاسقان ازاماتتاردىڭ ءبىرى ءامرۋدديننىڭ سوزىنە قاراعاندا، 6 قىركۇيەكتە كونسۋلدىق عيماراتى ماڭىنا جينالعاندار 100-گە جۋىقتاعان.
امرۋددين وسىدان 10 كۇن بۇرىن ەلشىلىككە كىرۋ ءۇشىن تىركەلگەنىن، ءبىراق ءالى كۇنگە دەيىن ءوزىن ەشكىم قابىلداماعانىن ايتتى.
– مازاري-شاريفتەن كەلگەنىمىزگە 20 كۇن بولدى. ءبىزدى ەشكىم قابىلدامايدى. قولدارىندا قازاق دەپ جازىلعان قۇجاتى بار ادامدار بولسا عانا ىشكە شاقىرىپ قابىلدايدى. كەشە (5 قىركۇيەك) قازاقستاننان كەلگەن كونسۋلدىقتىڭ ءبىر وكىلى "سەندەر قازاقستاندا تۇراتىن تۋىستارىڭ ارقىلى سول جاقتاعى كوشى-قون پوليسياسىنان وزدەرىڭ مەن جاقىندارىڭنىڭ اتى-جوندەرىن تىزىمدەتىپ، ءمور باسقىزىڭدار دا بىزگە جىبەرىڭدەر. سوندا سەندەردى جىلدام قابىلدايمىز دەپ ايتتى. ءبىراق بىزدە ونداي مۇمكىندىك جوق، – دەيدى امرۋددين ازاتتىق تىلشىسىنە.
كابۋلداعى قازاقستان ەلشىلىگىنىڭ الدىندا جۇرگەنىنە ون شاقتى كۇن بولعانىن ايتقان حاليوللا دا "ءبىزدى ەشكىم قابىلداماي جاتىر. مەندە جەكە كۋالىك تە، پاسپورت تا جوق. بىزگە "ونداي ادامداردى مۇلدەم قابىلدامايمىز دەدى" دەپ شاعىمداندى.
ازاتتىققا كەلىپ تۇسكەن ۆيدەودا كونسۋلدىق عيماراتىنا ۇقساس مەكەمە سىرتىندا كەمىندە 20 شاقتى ەر ادامنىڭ قۇجات ۇستاپ تۇرعانى كورىنەدى. ۆيدەودان ناقتى قانشا ادامنىڭ تۇرعانىن كورۋ مۇمكىن ەمەس. كەيبىرى عيمارات ماڭىنداعى اعاشتاردىڭ كولەڭكەسىن سايالاعان. ۆيدەو 6 قىركۇيەكتە تۇسىرىلگەن دەپ ايتىلادى.
قازاقستان سىرتقى ىستەر مينيسترلىگى اۋعانستانداعى قازاقتاردىڭ شاعىمىنا بايلانىستى كەشىرەك جاۋاپ بەرەتىنىن ايتتى. ال قازاقستاننىڭ اۋعانستانداعى ەلشىلىگىنەن جاۋاپ الۋ مۇمكىن بولمادى.
اۋعانستاندا "تاليبان" توبى بيلىك ورناتقاننان كەيىن ۇلتى قازاق ەكەنىن ايتىپ، قازاقستان ۇكىمەتىنەن اۋعانستاننان الىپ كەتۋدى سۇراپ، وتىنگەن ازاماتتار كوبەيگەن. وتكەن اپتانىڭ سوڭىندا اۋعانستاننىڭ سامانعان ءۋالاياتىندا تۇراتىن قازاق وتباسىلارى رەسمي نۇر-سۇلتاننان قازاقستانعا الىپ كەتۋدى سۇراپ، ۆيدەومالىمدەمە جولداعان.
قازاقستان سىرتقى ىستەر ءمينيسترىنىڭ رەسمي وكىلى ايبەك سمادياروۆ بۇعان دەيىن ازاتتىققا اۋعانستانداعى قازاقتاردى قازاقستانعا قايتارۋ جونىندە ءىس-شارانىڭ باستالعانىن، الايدا ونداعى ساياسي-اسكەري احۋالدىڭ ناشارلاۋىنا بايلانىستى قازاقتاردى قايتارۋدىڭ ناقتى مەرزىمى بەلگىلەنبەگەنىن ايتقان.
رەسمي وكىلدىڭ ازاتتىققا بەرگەن جازباشا جاۋابىندا "قازاقستاننىڭ اۋعانستانداعى ەلشىلىگىنىڭ جانىندا ەتنيكالىق قازاقتاردى انىقتايتىن ارنايى كوميسسيا قۇرىلدى جانە ول ءوز جۇمىسىن جۇرگىزىپ جاتىر. اتالعان كوميسسيا ەلشىلىككە جۇگىنگەن ءار تۇلعانىڭ قۇجاتتارىن كەشەندى قاراستىرىپ، شەشىم قابىلدايدى. ءوتىنىش بىلدىرۋشىمەن جان-جاقتى سۇحبات وتكىزىپ، اۋعان تاراپى بەرگەن ءتولقۇجاتتارىن تەكسەرەدى. سونداي-اق، قازاق ءتىلى، مادەنيەتى مەن ءسالت-داستۇرى بويىنشا سۇراقتار قويادى" دەپ جازىلعان.
"تاليبان" قوزعالىسى كابۋلدى باسىپ العاننان كەيىن قازاقستان بيلىگى "اۋعانستاندا 15 قازاق وتباسى نەمەسە 200-گە تارتا ەتنيكالىق قازاق بار" دەگەن. الايدا اۋعانستاندا تۇراتىن قازاقتار وزدەرىنىڭ بۇدان كوپ ەكەنىن ايتىپ، 30-عا تارتا وتباسىن ساناپ شىقتى.
