"Aýǵanstandaǵy qazaq konsýldyǵynyń aldynda turǵanymyzǵa 20 kún boldy" dep Azattyqqa habarlasqan azamattardyń biri Amrýddınniń sózine qaraǵanda, 6 qyrkúıekte konsýldyq ǵımaraty mańyna jınalǵandar 100-ge jýyqtaǵan.
Amrýddın osydan 10 kún buryn elshilikke kirý úshin tirkelgenin, biraq áli kúnge deıin ózin eshkim qabyldamaǵanyn aıtty.
– Mazarı-SHarıften kelgenimizge 20 kún boldy. Bizdi eshkim qabyldamaıdy. Qoldarynda qazaq dep jazylǵan qujaty bar adamdar bolsa ǵana ishke shaqyryp qabyldaıdy. Keshe (5 qyrkúıek) Qazaqstannan kelgen konsýldyqtyń bir ókili "Sender Qazaqstanda turatyn týystaryń arqyly sol jaqtaǵy kóshi-qon polısıasynan ózderiń men jaqyndaryńnyń aty-jónderin tizimdetip, mór basqyzyńdar da bizge jiberińder. Sonda senderdi jyldam qabyldaımyz dep aıtty. Biraq bizde ondaı múmkindik joq, – deıdi Amrýddın Azattyq tilshisine.
Kabýldaǵy Qazaqstan elshiliginiń aldynda júrgenine on shaqty kún bolǵanyn aıtqan Halıolla da "Bizdi eshkim qabyldamaı jatyr. Mende jeke kýálik te, pasport ta joq. Bizge "ondaı adamdardy múldem qabyldamaımyz dedi" dep shaǵymdandy.
Azattyqqa kelip túsken vıdeoda konsýldyq ǵımaratyna uqsas mekeme syrtynda keminde 20 shaqty er adamnyń qujat ustap turǵany kórinedi. Vıdeodan naqty qansha adamnyń turǵanyn kórý múmkin emes. Keıbiri ǵımarat mańyndaǵy aǵashtardyń kóleńkesin saıalaǵan. Vıdeo 6 qyrkúıekte túsirilgen dep aıtylady.
Qazaqstan syrtqy ister mınıstrligi Aýǵanstandaǵy qazaqtardyń shaǵymyna baılanysty keshirek jaýap beretinin aıtty. Al Qazaqstannyń Aýǵanstandaǵy elshiliginen jaýap alý múmkin bolmady.
Aýǵanstanda "Talıban" toby bılik ornatqannan keıin ulty qazaq ekenin aıtyp, Qazaqstan úkimetinen Aýǵanstannan alyp ketýdi surap, ótingen azamattar kóbeıgen. Ótken aptanyń sońynda Aýǵanstannyń Samanǵan ýálaıatynda turatyn qazaq otbasylary resmı Nur-Sultannan Qazaqstanǵa alyp ketýdi surap, vıdeomálimdeme joldaǵan.
Qazaqstan syrtqy ister mınıstriniń resmı ókili Aıbek Smadıarov buǵan deıin Azattyqqa Aýǵanstandaǵy qazaqtardy Qazaqstanǵa qaıtarý jóninde is-sharanyń bastalǵanyn, alaıda ondaǵy saıası-áskerı ahýaldyń nasharlaýyna baılanysty qazaqtardy qaıtarýdyń naqty merzimi belgilenbegenin aıtqan.
Resmı ókildiń Azattyqqa bergen jazbasha jaýabynda "Qazaqstannyń Aýǵanstandaǵy elshiliginiń janynda etnıkalyq qazaqtardy anyqtaıtyn arnaıy komısıa quryldy jáne ol óz jumysyn júrgizip jatyr. Atalǵan komısıa elshilikke júgingen ár tulǵanyń qujattaryn keshendi qarastyryp, sheshim qabyldaıdy. Ótinish bildirýshimen jan-jaqty suhbat ótkizip, aýǵan tarapy bergen tólqujattaryn tekseredi. Sondaı-aq, qazaq tili, mádenıeti men salt-dástúri boıynsha suraqtar qoıady" dep jazylǵan.
"Talıban" qozǵalysy Kabýldy basyp alǵannan keıin Qazaqstan bıligi "Aýǵanstanda 15 qazaq otbasy nemese 200-ge tarta etnıkalyq qazaq bar" degen. Alaıda Aýǵanstanda turatyn qazaqtar ózderiniń budan kóp ekenin aıtyp, 30-ǵa tarta otbasyn sanap shyqty.
