مەملەكەتتىك كىرىستەر كوميتەتى ءتورت اي بويى سالىق قارىزىن وتەمەگەن، بورىشى 150 اەك-تەن (589،8 مىڭ تەڭگە) اساتىن كومپانيالاردىڭ تولىق ءتىزىمىن جاريالادى. كوميتەت دەرەگىنە سۇيەنگەن Dalanews.kz مالىمەتىنشە، بۇل تىزىمدە 15 مىڭنان اسا كومپانيا بار، ولاردىڭ جالپى قارىزى 758،7 ملرد تەڭگەگە جەتكەن.
قارىزىن وتەمەي جۇرگەندەر كىمدەر؟
ەڭ نازار اۋدارارلىعى وسى قارىزدىڭ 60 پايىزى نەمەسە 448،3 ملرد تەڭگەسى نەبارى 10 كومپانيانىڭ ەنشىسىندە ەكەن. بورىشكەرلەر اراسىندا بەلسەندى جۇمىس ىستەپ تۇرعان دا، ءقازىر جۇمىسىن توقتاتقان دا كومپانيالار كەزدەسەدى. ولاردىڭ كەيبىرى تۋرالى دەرەك از.
ەڭ كوپ سالىق بەرەشەگى بار كومپانيالار مىنالار:
- Ai-To Progress – 104،1 ملرد تەڭگە (الماتى، تىركەلگەن جىلى – 2007، كوتەرمە ساۋدامەن اينالىسادى)؛
- TEX ALLIANCE – 94،1 ملرد تەڭگە (الماتى وبلىسى، تىركەلگەن جىلى – 2013، كوتەرمە ساۋدا)؛
- Alpha-bet – 88،1 ملرد تەڭگە (الماتى، تىركەلگەن جىلى – 2015، قۇمار ويىندار ۇيىمداستىرۋشى، شەتەلدىك ۇلەسى بار كومپانيا)؛
- OLIMP KZ بۋكمەكەرلىك كەڭسەسى – 80،2 ملرد تەڭگە (استانا، تىركەلگەن جىلى – 2006، سپورت سالاسى)؛
- GB Invest – 43،5 ملرد تەڭگە (الماتى وبلىسى، تىركەلگەن جىلى – 2011، بولشەك ساۋدا)؛
- "كاستينگ" – 18،1 ملرد تەڭگە (الماتى، تىركەلگەن جىلى – 1999، ءتۇستى مەتالل قۇيۋ، شەتەلدىك قاتىسۋى بار، بىرلەسكەن كاسىپورىن)؛
- "كازگەرستروي" بىرلەسكەن كاسىپورنى – 8،9 ملرد تەڭگە (استانا، تىركەلگەن جىلى – 2004، تۇرعىن ءۇي قۇرىلىسى)؛
- "پفد ينتەرنەشنل" اتىراۋ فيليالى – 3،8 ملرد تەڭگە (اتىراۋ وبلىسى، تىركەلگەن جىلى – 2000، شەتەلدىك كومپانيا)؛
- "فورتستروي-ت" – 3،69 ملرد تەڭگە (استانا، تىركەلگەن جىلى – 2020، قۇرىلىس-مونتاج جۇمىستارى)؛
- GL-TRANSPORT – 3،59 ملرد تەڭگە (الماتى، تىركەلگەن جىلى – 1999، اۆتوبۋس تاسىمالى).
سالىق بەرەشەگىنىڭ باسىم بولىگى مىنا بەس وڭىرگە تيەسىلى:
- الماتى قالاسى – 369،9 ملرد تەڭگە؛
- الماتى وبلىسى – 151،5 ملرد تەڭگە؛
- استانا قالاسى – 53،1 ملرد تەڭگە؛
- قاراعاندى وبلىسى – 45،9 ملرد تەڭگە؛
- اقتوبە وبلىسى – 38،1 ملرد تەڭگە.
پرەمەر-مينيستر بەكتەنوۆتىڭ ەسكەرتۋى
28 اقپاندا پرەمەر-مينيستر ولجاس بەكتەنوۆ ۆيسە-پرەمەر-ۇلتتىق ەكونوميكا ءمينيسترى سەرىك جۇمانعارينمەن جانە قارجى ءمينيسترى ءمادي تاكييەۆپەن بىرگە جۇمىس كەڭەسىن وتكىزدى. كەڭەستە سالىق-بيۋدجەت رەفورماسى جانە سالىق تۇسىمدەرىن باقىلاۋدى كۇشەيتۋ ماسەلەلەرى قارالدى.
قارجى ءمينيسترى ءمادي تاكييەۆ جۇرگىزىلگەن تالداۋ شەڭبەرىندە سالىق تولەۋشىلەر شاعىن كاسىپكەرلىكتى قولداۋ جانە دامىتۋ ماقساتىندا بۇرىن ەنگىزىلگەن ارنايى سالىق رەجيمدەرىن (سرپ) پايدالانعانى انىقتالعانىن باياندادى.
"قارجى ءمينيسترىنىڭ اقپاراتىنان سالىق جۇكتەمەسىن وڭتايلاندىرۋدىڭ ءارتۇرلى سحەمالارىن قولدانا وتىرىپ، مىندەتىن ادال اتقارمايتىن كاسىپكەرلەر بارىن كورىپ وتىرمىز. ميللياردتاعان اينالىممەن ولار بيۋدجەتكە وزدەرىنىڭ تاپقان پايداسىنا مۇلدەم سايكەس كەلمەيتىن سومالاردى تولەيدى. بىزدە وسىنداي ءىرى كومپانيالاردىڭ تولىق ءتىزىمى بار. ول تىزىمدە BI Group، BAZIS جانە باسقا دا كوپتەگەن ءىرى قۇرىلىس كومپانياسى ءجۇر. ەكونوميكانىڭ باسقا سالالارىندا جۇمىس ىستەيتىن بەلگىلى ءارى تانىمال مەيرامحانالار، فيتنەس-كلۋبتار جانە ءارتۇرلى كومپانيالار بار. وسى مۇمكىندىكتى پايدالانا وتىرىپ، ءقازىر سالىق جۇكتەمەسىن وڭتايلاندىرۋدىڭ ءتۇرلى سحەمالارىن قولداناتىن ءىرى كومپانيالاردىڭ يەلەرى مەن باسشىلارىنا قاراتا ايتقىم كەلەدى. بۇگىن-ەرتەڭ سىزدەردىڭ كومپانيالارىڭىزعا سالىق ورگاندارىنان قوسىمشا سالىق سومالارىن تولەۋ قاجەتتىلىگى تۋرالى حابارلامالار كەلىپ تۇسەدى"، - دەدى بەكتەنوۆ.
ولجاس بەكتەنوۆ كاسىپكەرلەردەن ەكى اپتا ىشىندە سالىق ورگاندارىنا قوسىمشا سالىق دەكلاراسيالارىن تاپسىرۋدى جانە شىنايى سالىق سوماسىن تولەۋدى سۇرادى.
"ەگەر بۇل ارەكەتتەر جاسالماسا، مەملەكەت فيسكالدىق جانە قۇقىق قورعاۋ ورگاندارىن قوسقاندا، مەملەكەت يەلىگىندەگى بارلىق رەسۋرستى قولدانۋ قۇقىعىن وزىنە قالدىرادى. مۇنىڭ سوڭى قيىن بولادى، ءبىراق ەگەر بيزنەس مەملەكەت الدىنداعى مىندەتتەمەسىن ادىلەتتى تۇردە ورىنداۋعا دايىن بولسا، ءبىز ديالوگقا دايىنبىز"، - دەدى ولجاس بەكتەنوۆ.
