حالىقارالىق دەڭگەيدە ۇيىمداستىرىلعان شاراعا ەلىمىزدەگى ءىرى-ىرى دەگەن ۇلتتىق كومپانيا وكىلدەرى، وتاندىق كاسىپكەرلەرمەن قاتار، شەتەلدىك ينۆەستورلار دا قاتىستى.
ايتا كەتۋ كەرەك، بۇگىنگى تاڭدا قازاقستاندا 11 ەكونوميكالىق ايماق بار. سونىڭ ىشىندە قاراعاندىداعى ارنايى ەكونوميكالىق ايماق مەتاللۋرگيا جانە ماشينا قۇرىلىسىنا مامانداندىرىلعان.
قازىرگى كەزدە «سارىارقا» يندۋستريالدى ايماعىندا وتقا ءتوزىمدى بۇيىمدار، شارلى كراندار مەن ەسكى كولىكتەردىڭ قالدىقتارىنان قۇرىشتار وندىرىلەدى. بولاشاقتا بۇل ايماقتا تاعى 6 جوبانى جۇزەگە اسىرۋ جوسپارلانىپ وتىر.
فورۋمدا ءسوز سويلەگەن قاراعاندى وبلىسى اكىمىنىڭ ورىنباسارى الماز ايداروۆتىڭ ايتۋىنشا ، وڭىردە ينۆەستورلارعا بارىنشى ءتيىمدى جاعداي جاسالعان.
«يندۋستريالدىق الاڭ شيكىزات الىناتىن ورىندارعا جاقىن ورنالاسقاندىعىمەن قوسا، ارزان ەلەكتر قۋاتىن الۋعا دا مۇمكىندىك بار. ءقازىر ءبىزدىڭ ءار ينۆەستورعا 50 مەگاۆاتت كولەمىندە ەلەكتر قۋاتىن بەرۋگە قاۋقارىمىز جەتەدى»، – دەدى وسى رەتتە الماز ايداروۆ.
ال وسى فورۋمعا سوناۋ جاپون جەرىنەن كەلگەن كاسىپكەر ميكي ۆادزيما سوڭعى جىلدارى قازاقستان مەن جاپونيا اراسىنداعى ساۋدا ينۆەستيسياسىن 9 ەسەگە ارتتىرعانىن تىلگە تيەك ەتتى.
«بۇل – وتە جاقسى كورسەتكىش. دەگەنمەن، ءىرى ينۆەستيسيالىق جوبالاردى ۇلعايتۋ باعىتىندا ءالى دە جۇمىس جاساۋ كەرەك. ەكولوگيا مەن سۋ تەحنولوگيالارىن دامىتۋ جولدارىن قاراستىراتىن ينۆەستيسيالىق جوبالاردى ۇسىنىپ وتىرمىز»، – دەيدى ول.
