ەلدىڭ التى ايماعىندا انا ءولىمىنىڭ ارتقانى تىركەلدى. بۇل تۋرالى دەنساۋلىق ساقتاۋ ءمينيسترى اقمارال ءالنازاروۆا ۇكىمەت وتىرىسىندا مالىمدەدى، دەپ حابارلايدى Dalanews.kz.

مينيسترلىكتىڭ دەرەگىنشە، انا ءولىمىنىڭ ەڭ كوپ جاعدايى اقمولا وبلىسىندا انىقتالعان. مۇنداعى كورسەتكىش رەسپۋبليكالىق ورتاشا دەڭگەيدەن جەتى ەسە جوعارى.

سونىمەن قاتار انالار ءولىمى جەتىسۋ، جامبىل، اباي، اقتوبە جانە قوستاناي وبلىستارىندا دا جوعارى دەڭگەيدە قالىپ وتىر.

“انا ءولىمىنىڭ قۇرىلىمىندا اۋىر ەكستراگەنيتالدى اۋرۋ 55% (10 جاعداي)، ال اكۋشەرلىك سەبەپتەر 45% (8 جاعداي) قۇراپ وتىر. وسىعان بايلانىستى عىلىمي ورتالىقتار مەن جوعارى وقۋ ورىندارىنىڭ مۋلتيديسيپلينارلى توپتارى ءاربىر وقيعانى جەكە-جەكە تالداپ جاتىر”، – دەدى مينيستر.

سونداي-اق كىزىلوردا، قوستاناي، باتىس قازاقستان، جامبىل جانە اباي وبلىستارىندا نارەستە ءولىمىنىڭ ءوسىمى تىركەلگەن.

“نارەستە ءولىمىنىڭ سەبەپتەرى اراسىندا العاشقى ورىندا پەريناتالدىق كەزەڭدەگى اسقىنۋلار (47،7%)، ەكىنشى ورىندا – تۋا بىتكەن دامۋ اقاۋلارى (19،6%)، ءۇشىنشى ورىندا – تىنىس الۋ جۇيەسى اۋرۋلارى (7،6%) تۇر”، – دەپ ناقتىلادى ءالنازاروۆا.

ءۇي جاعدايىندا بولعان ءولىم-جىتىم دە الاڭداۋشىلىق تۋدىرىپ وتىر: پاۆلودار، سولتۇستىك قازاقستان، قوستاناي جانە ۇلىتاۋ وبلىستارىندا بۇل كورسەتكىش ەل بويىنشا ورتاشا دەڭگەيدەن ەكى ەسە جوعارى.

وسىعان بايلانىستى دەنساۋلىق ساقتاۋ مينيسترلىگى جەرگىلىكتى اتقارۋشى ورگانداردى قوسىمشا قارجىلاندىرۋدى قاراستىرۋعا شاقىردى. قاراجات مەديسينا قىزمەتكەرلەرىن جەتكىلىكتى قامتۋعا، ولاردىڭ بىلىكتىلىگىن ارتتىرۋعا، ماتەريالدىق-تەحنيكالىق بازانى نىعايتۋعا، جۇكتى ايەلدەر مەن بالالارعا ارنالعان كولىكپەن قامتاماسىز ەتۋگە، سونداي-اق وسال توپتاعى ايەلدەرگە كونتراسەپتيۆتەر ۇسىنۋعا قاجەت.

ايتا كەتەرلىگى، 2025 جىلدىڭ العاشقى بەس ايىندا ەل كولەمىندە انا مەن نارەستە ءولىمىنىڭ جالپى تومەندەۋى بايقالعان. دەنساۋلىق ساقتاۋ مينيسترلىگى مەن ۇلتتىق ستاتيستيكا بيۋروسىنىڭ دەرەگىنە سۇيەنسەك، وسى كەزەڭدە نارەستە ءولىمى 26،3%-عا، ال انا ءولىمى 9،7%-عا ازايعان.