Eldiń alty aimaǵynda ana óliminiń artqany tirkeldi. Bul týraly Densaýlyq saqtaý ministri Aqmaral Álnazarova Úkimet otyrysynda málimdedi, dep habarlaidy Dalanews.kz.
Ministrliktiń dereginshe, ana óliminiń eń kóp jaǵdaiy Aqmola oblysynda anyqtalǵan. Mundaǵy kórsetkish respýblikalyq ortasha deńgeiden jeti ese joǵary.
Sonymen qatar analar ólimi Jetisý, Jambyl, Abai, Aqtóbe jáne Qostanai oblystarynda da joǵary deńgeide qalyp otyr.
“Ana óliminiń qurylymynda aýyr ekstragenitaldy aýrý 55% (10 jaǵdai), al akýsherlik sebepter 45% (8 jaǵdai) qurap otyr. Osyǵan bailanysty ǵylymi ortalyqtar men joǵary oqý oryndarynyń mýltidistsiplinarly toptary árbir oqiǵany jeke-jeke taldap jatyr”, – dedi ministr.
Sondai-aq Kyzylorda, Qostanai, Batys Qazaqstan, Jambyl jáne Abai oblystarynda náreste óliminiń ósimi tirkelgen.
“Náreste óliminiń sebepteri arasynda alǵashqy orynda perinataldyq kezeńdegi asqynýlar (47,7%), ekinshi orynda – týa bitken damý aqaýlary (19,6%), úshinshi orynda – tynys alý júiesi aýrýlary (7,6%) tur”, – dep naqtylady Álnazarova.
Úi jaǵdaiynda bolǵan ólim-jitim de alańdaýshylyq týdyryp otyr: Pavlodar, Soltústik Qazaqstan, Qostanai jáne Ulytaý oblystarynda bul kórsetkish el boiynsha ortasha deńgeiden eki ese joǵary.
Osyǵan bailanysty Densaýlyq saqtaý ministrligi jergilikti atqarýshy organdardy qosymsha qarjylandyrýdy qarastyrýǵa shaqyrdy. Qarajat meditsina qyzmetkerlerin jetkilikti qamtýǵa, olardyń biliktiligin arttyrýǵa, materialdyq-tehnikalyq bazany nyǵaitýǵa, júkti áielder men balalarǵa arnalǵan kólikpen qamtamasyz etýge, sondai-aq osal toptaǵy áielderge kontratseptivter usynýǵa qajet.
Aita keterligi, 2025 jyldyń alǵashqy bes aiynda el kóleminde ana men náreste óliminiń jalpy tómendeýi baiqalǵan. Densaýlyq saqtaý ministrligi men Ulttyq statistika biýrosynyń deregine súiensek, osy kezeńde náreste ólimi 26,3%-ǵa, al ana ólimi 9,7%-ǵa azaiǵan.
