«نەگە ءبىز ءوز ازاماتتارىمىزعا جەردى جالعا بەرۋدى تالقىلاعاندا شەكارادان الشاق بولۋ ماسەلەسىن قويىپ وتىرمىز؟ مەنىڭشە، بۇل ماسەلەنى مۇلدەم الىپ تاستاۋ قاجەت. ماسەلەن، ءبىزدىڭ شەكارامىزدا مىڭداعان كيلومەتردە ەشكىم جوق. شەكارادا ەشكىم جوق. سول شەكارانى بارىپ، قايتا يگەرۋ كەرەك. سول شەكارادا ءبىز ەلدى مەكەندەردى قۇرۋىمىز قاجەت. سول جەردى يگەرۋىمىز كەرەك. سول سەبەپتى كۇن تارتىبىنە ەنگەن بۇل ماسەلە دۇرىس بولماعان سياقتى. بۇل شەتەلدىكتەر ەمەس، ءوز ازاماتتارىمىز عوي. كەرىسىنشە، ولارعا شەكارا ماڭىنان اۋىل شارۋاشىلىعى جەرلەرىن جالعا بەرۋ كەرەك»، - دەپ اتاپ كورسەتتى سەناتور.
ايتا كەتەيىك، وتىرىس بارىسىندا كوميسسيا شتابى قازاقستاندىقتارعا جەردى جالعا بەرۋ ماسەلەسى بويىنشا ناقتى ۇسىنىستاردى تالقىعا سالدى. سونىڭ اياسىندا جەر كودەكسىنىڭ ءبىر بابىنا وزگەرىستەر ەنگىزۋ كوزدەلگەن. وسىعان قاتيستى ساياساتتانۋشى دوس كوشىم دە ءوزى باسقاراتىن توپتىڭ ۇسىنىستارىن جاريالادى. ونىڭ ويىنشا، بارلىق اۋىلدىق وكرۋگتاردان ءبىر-بىر ادام كوميسسيانىڭ مۇشەسى بولۋى قاجەت. ال كوميسسيانىڭ جۇمىسىن پروكۋرور باقىلاۋ وتىرۋى شارت.
ارمان اسقاروۆ
