قاراعاندىداعى "Tau-Ken Temir" كرەمنيي زاۋىتى امەريكا بيلىگىمەن تاعى دا سوتتاسىپ جاتىر. تاعى دەيتىن سەبەبىمىز، وتاندىق كرەمنيي وندىرەتىن زاۋىت ەلىمىزدىڭ ساۋدا مينيسترلىگىنىڭ قولداۋىمەن 2022 جىلى امەريكالىق مەملەكەتتىك ورگانمەن سوتتاسقان. ويتكەنى 2020-2021 جىلدارى Tau-Ken Temir اقش-قا جەتكىزگەن ءونىمى بويىنشا وتەماقىعا قاتىستى تەرگەۋ ناتيجەلەرىنە كەلىسپەي، سوتقا جۇگىنگەن. اتاپ ايتقاندا، مەملەكەتتىك قولداۋعا بايلانىستى 160% وتەماقى باجىن ەنگىزۋگە قاتىستى، دەپ جازادى Dalanews.kz.
بۇعان دەيىن وسىعان ۇقساس تەرگەۋدى امەريكالىق ساۋدا مەملەكەتتىك ورگاندارى 2017-2018 جىلدارى جۇرگىزگەن، دەپ جازادى inbusiness.kz، ءبىراق ول كەزدە باج سالىعى الىنىپ تاستالعان. ال بۇگىنگى اپپەلياسيالىق سوت تۋرالى مالىمەت courtlistener.com سايتىندا جاريالانعان.
2022 جىلى، وزدەرىڭىز بىلەتىندەي، كرەمنيي زاۋىتى ءالى دە "تاۋ-كەن سامۇرىق" تاۋ-كەن مەملەكەتتىك حولدينگىنە تيەسىلى ەدى. سونىمەن قاتار، ول باستاپقىدا قازاقستاننىڭ دامۋ بانكىنىڭ (قدب) قارىز اقشاسىنا سالىنىپ، "بايتەرەك" ۇلتتىق حولدينگى قۇرىلىمدارىنىڭ ارالاسۋىمەن ساۋىقتىرىلعان.
امەريكالىق نارىق "Tau-Ken Temir" ءۇشىن ماڭىزدى، سوندىقتان اقش-قا جەتكىزىلىمنىڭ كىلت دوعارىلۋى 2019 جىلعى ءوندىرىس جۇمىستارىنىڭ توقتاۋىندا شەشۋشى ءرول اتقاردى. سوندىقتان بۇگىنگى سوت ىسىندە "Tau-Ken Temir" تەرگەۋ بارىسىندا اقش بيلىگىمەن ىنتىماقتاستىقتا بولعانىن دالەلدەۋگە تىرىسادى، دەگەنمەن ول تالاپ ەتىلگەن قۇجاتتاردى تاپسىرۋ جاعىنان كەشىگىپ قالعان. بۇل ارادا مەملەكەتتىك قولداۋدىڭ بار-جوعىنا تالداۋ جۇرگىزۋ ءۇشىن كومپانيالارعا جولداناتىن ساۋالناما تۋرالى ءسوز بولىپ وتىرۋى مۇمكىن.
"جۇمادا (10 قاڭتار - شامامەن) فەدەرالدى وكرۋگتىڭ اپەللياسيالىق سوتى القابيلەرىنىڭ "قازاقستاندىق مەتاللۋرگيالىق كومپانيا Tau-Ken Temir (TKT) جشس-عا اقش ساۋدا مينيسترلىگىنىڭ كەلىسىلگەن مەرزىم ۋاقىتىن ساقتاماعانى ءۇشىن 160% دەڭگەيىندەگى جوعارى وتەماقى باجىن ەنگىزۋى ورىندى ما" دەگەن ماسەلە بويىنشا تىڭدالىمدا جاۋاپتارعا كوڭىلى تولمادى. ءىستىڭ ءمانى تكت سۋبسيدياعا قارسى تەرگەۋ بارىسىندا قۇجاتتاردى ۋاقىتىندا بەرە الماۋىنا بايلانىستى ساۋدا مينيسترلىگى تاراپىنىڭ ايىپپۇل سانكسياسىن قولدانۋى زاڭدى-زاڭسىزدىعىنا بايلانىستى ايقىندالادى"، - دەپ جازادى USA Herald امەريكالىق باسىلىمى بۇل ءىس وزگەلەرگە ۇلگى بولۋى مۇمكىن ەكەنىن ءتۇسىندىرىپ.
2024 جىلدىڭ تامىز ايىندا "Tau-Ken Temir" جانە قاراعاندى وبلىسىنداعى اقتاس كۆارس كەن ورنىنان شيكىزات تاسىمالداۋشى Silicon Mining كومپانياسىنداعى 55% ۇلەستى Metaleen Investments Holdings LLC جانە TSP Aluminyum Anonim Sirketi كومپانيالارىنىڭ كونسورسيۋمى 4،9 ملرد تەڭگەگە جەكەشەلەندىرىپ العانى بەلگىلى. ءبىرىنشىسى قاتاردا تىركەلگەن، ال ەكىنشىسى – تۇرىك كومپانياسى.
بالكىم، بۇل مامىلەلەر "Tau-Ken Temir" ەندى مەملەكەتتىك كومپانيا ەمەس، دەمەك، مەملەكەتتىك قولداۋدان دا الشاق دەگەندى ءبىلدىرىپ، كاسىپورىن نەگىزگى امەريكالىق نارىققا وتەماقى باجىنسىز ەكسپورتتى قالپىنا كەلتىرگىسى كەلىپ جاتقان شىعار. وسى جاعىنان العاندا، كرەمنيي زاۋىتى قاراعاندىدا ءوز قىزمەتىن جالعاستىرۋ ءۇشىن اقش-تاعى سوت تالقىسىندا جەڭىسكە جەتەدى دەپ ۇمىتتەنەمىز. ەكى جىل بۇرىن بۇل زاۋىتتىڭ 2023 جىلدىڭ ءتورتىنشى توقسانىندا قايتا ىسكە قوسىلۋى مۇمكىن ەكەنى ايتىلعان. دەگەنمەن، ءوزىمىز كۋا بولىپ وتىرعانداي، ءقازىر 2025 جىل بولدى، ازىرگە زاۋىت ءالى تۇرالاپ تۇر.
