قازاقستاندىق شەنەۋنىكتەرگە شەتەلدەگى مۇلىكتەرىن جاسىرىن ۇستاۋ قيىندايدى، دەپ حابارلايدى Dalanews.kz.
ەكونوميكالىق ىنتىماقتاستىق جانە دامۋ ۇيىمى (ەىدۇ) شەتەلدەگى جىلجىمايتىن مۇلىك يەلەرى تۋرالى دەرەكتەردى اۆتوماتتى تۇردە الماسۋعا ارنالعان IPI MCAA اتتى جاڭا جۇيەنى ىسكە قوسپاق. جوباعا 26 مەملەكەت قوسىلدى. بۇل پلاتفورمادا وبەكتىنىڭ يەسى، مۇلىكتىڭ قۇنى، مامىلە تاريحى مەن جالعا بەرۋدەن تۇسەتىن تابىس سياقتى مالىمەتتەر جيناقتالاتىن بولادى.
سالىق سالۋ جونىندەگى مامان ايدار ماساتبايەۆتىڭ ايتۋىنشا، بۇعان دەيىن اۆتوماتتى اقپارات الماسۋ تەك بانك ەسەپشوتتارى مەن كريپتواكتيۆتەرگە قاتىستى جۇرگىزىلىپ، جىلجىمايتىن مۇلىك دەرەكتەرى اشىق بولماعان. سول سەبەپتى شەتەلدە تىركەلگەن پاتەرلەر مەن وزگە دە نىسانداردى وفشور ارقىلى جاسىرۋ سالىستىرمالى تۇردە وڭاي ەدى. ەندى بۇل ءتاسىل كۇردەلەنە تۇسەدى.
