رەسەي، قازاقستان جانە ەۋرازيالىق كەڭىستىكتەگى وزگە دە ەلدەردىڭ ەكونوميكالىق جانە ساياسي ىنتىماقتاستىعى ۇنەمى دامۋ ۇستىندە. رەسەيگە قارسى سانكسيالاردىڭ ەشبىرى وعان قاۋىپ-قاتەر ءتوندىرىپ نەمەسە سىزات تۇسىرە المايدى. استانادا 12 ماۋسىمدا اتاپ وتىلەتىن رەسەي كۇنىنە وراي ۇيىمداستىرىلعان ءىس-شارادا قازاقستانداعى رەسەي فەدەراسياسىنىڭ ەلشىسى الەكسەي بوروداۆكين وسىنداي مالىمدەمە جاسادى، دەپ حابارلايدى Dalanews.kz تاسس اگەنتتىگىنە سىلتەمە جاساپ.
"رەسەي مەن قازاقستان ەۋرازيا كەڭىستىگىندەگى كولىك بايلانىسىن دامىتۋ باعىتىندا كۇش بىرىكتىرۋدە. بۇل تۇرعىدا رەسەي، قازاقستان، تۇرىكمەنستان مەن يراندى پارسى شىعاناعىمەن بايلانىستىراتىن "سولتۇستىك – وڭتۇستىك" باعىتى اسا ماڭىزدى. سونداي-اق بۇل باعىت وزبەكستان، اۋعانستان جانە پاكىستان اۋماقتارىن قامتي وتىرىپ، ارالاس جۇك جانە جولاۋشى تاسىمالىنا ارنالعان ترانزيتتىك جەلى قۇرۋدى كوزدەيدى. ەكونوميكالىق ينتەگراسياداعى وڭ وزگەرىستەردى زاڭسىز سانكسيالار دا، ەكىنشى دەڭگەيلى شەكتەۋ شارالارى دا توقتاتا المايدى"، – دەدى ول.
ەلشى قازاقستانمەن جۇزەگە اسىپ جاتقان ماڭىزدى جوبالاردىڭ ءبىرى – بايقوڭىرداعى "بايتەرەك" كەشەنى ەكەنىن اتاپ ءوتتى. ونىڭ ايتۋىنشا، بيىلعى جەلتوقساندا اتالمىش كەشەننەن رەسەيلىك "سويۋز-5" زىمىرانى ۇشىرىلماق.
"رەسمي ەمەس مالىمەتكە سايكەس، رەسەيدىڭ قازاقستان ەكونوميكاسىنا قۇيعان ينۆەستيسياسى 56 ميلليارد دوللار شاماسىندا. قازاقستان اۋماعىندا شامامەن 20 مىڭ رەسەي-قازاق بىرلەسكەن كاسىپورنى جۇمىس ىستەپ تۇر. ەكى ەل اراسىنداعى ەسەپ ايىرىسۋدا ۇلتتىق ۆاليۋتالاردىڭ ۇلەسى 90 پايىزعا جەتتى"، – دەدى ول.
سونداي-اق بوروداۆكين رەسەي مەن قازاقستاننىڭ وداقتاس ەكەنىن جانە بۇل ۇستانىمدى حالىقارالىق ۇيىمدار اياسىنداعى بىرلەسكەن ارەكەتتەر ارقىلى بىرنەشە رەت دالەلدەگەنىن ايتتى.
"عاسىرلار بويى رەسەي ءتۇرلى بيىكتەر مەن تراگەديالاردى، جەڭىستەر مەن قۇلدىراۋ كەزەڭدەرىن باستان وتكەردى، بۇكىل الەمگە رۋحاني دامۋ، عىلىم، تەحنيكا، ونەر جانە ەكونوميكا سالاسىنداعى ەڭ ۇلكەن جەتىستىكتەرىن پاش ەتە ءبىلدى. رەسەي تەك ورىستاردىڭ عانا ەمەس، كوپتەگەن باسقا حالىقتاردىڭ دا شاڭىراعىنا اينالدى. بارلىق كوپتەگەن سىناقتاردان رەسەي ءاردايىم ودان دا كۇشتى، ءوز-وزىنە سەنىمدى، ءوز كۇشتەرى مەن سارقىلماس مۇمكىندىكتەرىنە يە بولا ءتۇستى. بۇعان ءبىز بۇگىن دە كۋا بولىپ وتىرمىز.قانشا سىناقتان وتسە دە، رەسەي جاسىعان جوق، قاتەلىكتەن ساباق الىپ، ودان سايىن قۋاتتى بولا ءتۇستى. بۇگىن ءبىز مۇنىڭ كۋاسى بولىپ وتىرمىز. 2024 جىلى 16 قىركۇيەكتە پرەزيدەنت قاسىم-جومارت توقايەۆ شەتەلدىك كوشباسشىلارمەن كەزدەسۋىنىڭ بىرىندە: "رەسەيدىڭ اسكەري تۇرعىدا جەڭىلمەيتىنى - فاكت" دەۋى دە تەگىن ەمەس"، - دەگەن بوروداۆكين قازاقستاندا ورىس تىلىنە قولداۋ كورسەتىلىپ كەلە جاتقانىن دا باسا اتاپ ءوتتى.
بۇعان دەيىن مەملەكەت باسشىسى ۆلاديمير ءپۋتيندى رەسەي كۇنىمەن قۇتتىقتاعان بولاتىن.
