ەلىمىزدىڭ اتوم ەنەرگياسى جونىندەگى اگەنتتىگى حالىقارالىق ساراپشىلاردىڭ قاتىسۋىمەن قازاقستانداعى العاشقى اتوم ەلەكتر ستانسياسىن سالۋ ءۇشىن كونسورسيۋم كوشباسشىسىن ايقىنداۋ جۇمىسىن اياقتادى،-دەپ حابارلايدى Dalanews.kz
اگەنتتىك باسپا ءسوز قىزمەتىنىڭ مالىمەتىنشە، اشىق جانە باسەكەلى ديالوگ ادىسىمەن رەاكتورلىق تەحنولوگيالاردىڭ جەتەكشى الەمدىك جەتكىزۋشىلەرىنىڭ باسشىلارىمەن كەلىسسوزدەر ءوتىپ، كومپانيالاردىڭ وندىرىستىك نىساندارىن ماماندار ارالاپ شىققان.
"جۇرگىزىلگەن جۇمىستىڭ ناتيجەلەرى بويىنشا ىقتيمال ۆەندورلاردىڭ "ءشورت-ليستى" قۇرامىنا "روساتوم" (رەسەي)، "China National Nuclear Corporation" (جۇڭگو)، "Électricité de France" (فرانسيا) جانە "Korea Hydro & Nuclear Power" (وڭتۇستىك كورەيا) ەندى"، – دەپ حابارلادى اتوم ەنەرگياسى جونىندەگى اگەنتتىك.
حابارلامادا ايتىلعانداي، شورت-ليستكە ەنگەن كومپانيالار قازاقستاندا اەس سالۋ بويىنشا تەحنيكالىق جانە كوممەرسيالىق ۇسىنىستاردان تۇراتىن كەشەندى ماتەريالدار توپتاماسىن ۇسىندى. ولاردىڭ ىشىندە مىناداي مالىمەتتەر بولدى:
- قۇرىلىس قۇنىنىڭ بولجامدى سمەتاسى؛
- جوبانى ىسكە اسىرۋ مەرزىمدەرى؛
- قارجىلاندىرۋ تارتۋ مودەلى؛
- جابدىق پەن قۇرىلىس جۇمىستارىن جەرگىلىكتەندىرۋ تاسىلدەرى؛
- كادرلار دايارلاۋ جانە ءعىلىمي-بىلىم بەرۋ الەۋەتىن دامىتۋ بويىنشا ۇسىنىستار؛
- يادرولىق وتىن سيكلى سالاسىنداعى ىنتىماقتاستىق مۇمكىندىكتەرى؛
- الەۋمەتتىك مىندەتتەمەلەر ماسەلەلەرى.
"ناتيجەسىندە، ق ر اتوم ەنەرگياسى اگەنتتىگى "قازاقستاندىق اتوم ەلەكتر ستانسيالارى" ج ش س جانە فرانسۋزدىڭ Assystem ينجينيرينگتىك كومپانياسىنىڭ قاتىسۋىمەن ازىرلەگەن ادىستەمە نەگىزىندە ۇسىنىلعان رەاكتورلىق تەحنولوگيالار مەن ۆەندورلاردىڭ وزگە دە ۇسىنىستارىنا كەشەندى باعالاۋ جۇرگىزىلدى. باعالاۋ اەس قاۋىپسىزدىگى، تەحنولوگيالىق جانە قارجىلىق اسپەكتىلەر، حالىقارالىق تاجىريبە، پەرسونال دايارلاۋ، جەرگىلىكتەندىرۋ دەڭگەيى جانە باسقا دا بولىمدەر بويىنشا جۇرگىزىلدى. وسى تالداۋدىڭ قورىتىندىلارى اتوم سالاسىن دامىتۋ ماسەلەلەرى جونىندەگى ۆەدومستۆوارالىق كوميسسيانىڭ قاراۋىنا ۇسىنىلىپ، قازاقستاندا اەس سالۋ بويىنشا ەڭ وڭتايلى ءارى ءتيىمدى ۇسىنىس رەتىندە رەسەيلىك "روساتوم" كومپانياسىنىڭ ۇسىنىسى تاڭدالدى. ودان كەيىنگى ورىنعا قىتايلىق "China National Nuclear Corporation" ۇسىنىسى ورنالاستى. فرانسيالىق "Électricité de France" پەن كورەيالىق "Korea Hydro & Nuclear Power" ۇسىنىستارى ءۇشىنشى ورىندى ءبولىستى. وسىلايشا، "روساتوم" كومپانياسى قازاقستانداعى العاشقى اەس سالۋ جوباسى بويىنشا حالىقارالىق كونسورسيۋمنىڭ كوشباسشىسى رەتىندە ايقىندالدى"، – دەپ قوستى اگەنتتىك باسپا ءسوز قىزمەتى.
ءقازىر "روساتوم" ۇسىنىستارىنا سايكەس رەسەي فەدەراسياسى ەسەبىنەن مەملەكەتتىك ەكسپورتتىق قارجىلاندىرۋ تارتۋ ماسەلەسى قاراستىرىلىپ جاتىر.
"اگەنتتىك قازاقستاندا العاشقى اەس سالۋ ءۇشىن ءتيىمدى حالىقارالىق كونسورسيۋم قالىپتاستىرۋ بويىنشا شەتەلدىك سەرىكتەستەرمەن جۇمىستى جالعاستىرادى"، – دەپ تۇيىندەدى ۆەدومستۆونىڭ باسپا ءسوز قىزمەتى.
