Elimizdiń Atom energiiasy jónindegi agenttigi halyqaralyq sarapshylardyń qatysýymen Qazaqstandaǵy alǵashqy atom elektr stantsiiasyn salý úshin konsortsiým kóshbasshysyn aiqyndaý jumysyn aiaqtady,-dep habarlaidy Dalanews.kz
Agenttik baspasóz qyzmetiniń málimetinshe, ashyq jáne básekeli dialog ádisimen reaktorlyq tehnologiialardyń jetekshi álemdik jetkizýshileriniń basshylarymen kelissózder ótip, kompaniialardyń óndiristik nysandaryn mamandar aralap shyqqan.
"Júrgizilgen jumystyń nátijeleri boiynsha yqtimal vendorlardyń "short-listi" quramyna "Rosatom" (Resei), "China National Nuclear Corporation" (Qytai), "Électricité de France" (Frantsiia) jáne "Korea Hydro & Nuclear Power" (Ońtústik Koreia) endi", – dep habarlady Atom energiiasy jónindegi agenttik.
Habarlamada aitylǵandai, short-listke engen kompaniialar Qazaqstanda AES salý boiynsha tehnikalyq jáne kommertsiialyq usynystardan turatyn keshendi materialdar toptamasyn usyndy. Olardyń ishinde mynadai málimetter boldy:
- qurylys qunynyń boljamdy smetasy;
- jobany iske asyrý merzimderi;
- qarjylandyrý tartý modeli;
- jabdyq pen qurylys jumystaryn jergiliktendirý tásilderi;
- kadrlar daiarlaý jáne ǵylymi-bilim berý áleýetin damytý boiynsha usynystar;
- iadrolyq otyn tsikli salasyndaǵy yntymaqtastyq múmkindikteri;
- áleýmettik mindettemeler máseleleri.
"Nátijesinde, QR Atom energiiasy agenttigi "Qazaqstandyq atom elektr stantsiialary" JShS jáne frantsýzdyń Assystem injiniringtik kompaniiasynyń qatysýymen ázirlegen ádisteme negizinde usynylǵan reaktorlyq tehnologiialar men vendorlardyń ózge de usynystaryna keshendi baǵalaý júrgizildi. Baǵalaý AES qaýipsizdigi, tehnologiialyq jáne qarjylyq aspektiler, halyqaralyq tájiribe, personal daiarlaý, jergiliktendirý deńgeii jáne basqa da bólimder boiynsha júrgizildi. Osy taldaýdyń qorytyndylary atom salasyn damytý máseleleri jónindegi Vedomstvoaralyq komissiianyń qaraýyna usynylyp, Qazaqstanda AES salý boiynsha eń ońtaily ári tiimdi usynys retinde reseilik "Rosatom" kompaniiasynyń usynysy tańdaldy. Odan keiingi orynǵa qytailyq "China National Nuclear Corporation" usynysy ornalasty. Frantsiialyq "Électricité de France" pen koreialyq "Korea Hydro & Nuclear Power" usynystary úshinshi oryndy bólisti. Osylaisha, "Rosatom" kompaniiasy Qazaqstandaǵy alǵashqy AES salý jobasy boiynsha halyqaralyq konsortsiýmnyń kóshbasshysy retinde aiqyndaldy", – dep qosty agenttik baspasóz qyzmeti.
Qazir "Rosatom" usynystaryna sáikes Resei Federatsiiasy esebinen memlekettik eksporttyq qarjylandyrý tartý máselesi qarastyrylyp jatyr.
"Agenttik Qazaqstanda alǵashqy AES salý úshin tiimdi halyqaralyq konsortsiým qalyptastyrý boiynsha sheteldik seriktestermen jumysty jalǵastyrady", – dep túiindedi vedomstvonyń baspasóz qyzmeti.
