قازاقستانداعى العاشقى اتوم ەلەكتر ستانسياسىنا اتاۋ بەرۋ كونكۋرسىنا ءبىر تاۋلىكتىڭ ىشىندە eGov Mobile قوسىمشاسى ارقىلى 9945 ۇسىنىس جولدانعان. بۇل تۋرالى ق ر اتوم ەنەرگياسى اگەنتتىگىنىڭ باسپا ءسوز قىزمەتى مالىمدەدى، دەپ حابارلايدى Dalanews.kz.

«25 قىركۇيەك ساعات 12:00-دەن 26 قىركۇيەك ساعات 12:00-گە دەيىن eGov Mobile قوسىمشاسى ارقىلى قازاقستانداعى العاشقى اتوم ەلەكتر ستانسياسىنا اتاۋ بەرۋگە 9945 ۇسىنىس ءتۇستى»، – دەپ ناقتىلادى اگەنتتىك.

ۇيىمداستىرۋشىلاردىڭ ايتۋىنشا، باستامانىڭ ماقساتى – بولاشاق ستانسياعا تاريحي، مادەني جانە ۇلتتىق ماڭىزى بار اتاۋدى تاڭداۋ.

كونكۋرسقا قاتىسۋ ءۇشىن كەز كەلگەن قازاقستاندىق مىنا قادامداردى ورىنداي الادى:

• ءتىلدى تاڭداۋ (قازاق نەمەسە ورىس)؛

• ءوز اتاۋ نۇسقاسىن ەنگىزۋ؛

• قاجەت بولعان جاعدايدا اتاۋدىڭ ءمانىن قىسقاشا ءتۇسىندىرۋ؛

• رەسمي ەرەجەلەرمەن تانىسقانىن راستاۋ.

ۇسىنىستاردى قابىلداۋ 10 قازان كۇنى ساعات 23:59-عا دەيىن جالعاسادى. بايقاۋ ەرەجەلەرىمەن ق ر اتوم ەنەرگياسى اگەنتتىگىنىڭ رەسمي سايتىندا جانە الەۋمەتتىك جەلىلەردەگى پاراقشالارىنان تانىسۋعا بولادى.

ۇيىمداستىرۋشىلار بارلىق ازاماتتاردى ەنەرگەتيكا تاريحىنا ءوز ۇلەسىن قوسىپ، قازاقستاننىڭ العاشقى اتوم ەلەكتر ستانسياسىنا لايىقتى اتاۋ ۇسىنۋعا شاقىرادى.