قازاقستاندا زەينەتاقى، بيۋدجەت سالاسى قىزمەتكەرلەرىنىڭ جالاقىسى، سونداي-اق،اتاۋلى الەۋمەتتىك كومەك پەن تۇرعىن ءۇي كومەگىنىڭ كولەمى ۇلعايادى. بۇل تۋرالى سەناتتىڭ Taldau Talks پودكاسىندا ق ر پرەمەر-مينيسترىنىڭ ورىنباسارى – ۇلتتىق ەكونوميكا ءمينيسترى سەرىك جۇمانعارين مالىمدەدى، - دەپ حابارلايدى Dalanews.kz.

پودكاستىڭ بۇل شىعارىلىمى سالىق رەفورماسىنا، ققس وسىمىنە، سونداي-اق، ونىڭ بيۋدجەت پەن ينفلياسياعا اسەرىنە ارنالعان.

"زاڭ بويىنشا ينفلياسيا دەڭگەيىنە سايكەس زەينەتاقى مەن بيۋدجەت قىزمەتكەرلەرىنىڭ، مۇعالىمدەر مەن دارىگەرلەردىڭ جالاقىسىن يندەكساسيالاۋىمىز قاجەت. ءبىز بۇل مىندەتتى ورىندايمىز. 20 پايىزدىق مولشەرلەمەمەن بۇل 800 ميلليارد تەڭگە بولسا، 16 پايىزدىق مولشەرلەمەمەن 500-550 ميلليارد تەڭگە بولادى. سونىمەن قاتار، اتاۋلى الەۋمەتتىك كومەكتى ارتتىرامىز. ءقازىر ول 200 مىڭ ادامعا 40-45 ميلليارد تەڭگە كولەمىندە. ال تۇرعىن ءۇي كومەگىنە كەلسەك، تاريفتەردىڭ وسۋىنە بايلانىستى ونى دا ۇلعايتىپ، وتەيمىز"، – دەدى جۇمانعارين.

ايتا كەتەيىك، 20 اقپاندا پارلامەنت سالىق كودەكسى جوباسىنا تۇزەتۋلەردى قاراۋعا قابىلدادى.

جاڭا وزگەرىستەرگە سايكەس مىناداي تۇزەتۋلەر ەنگىزىلدى:

ققس بويىنشا مىندەتتى تىركەۋ ەسەبىنە قويۋ ءۇشىن شەكتى 20 مىڭ اەك-تەن (78،6 ميلليون تەڭگە) 3 800 اەك-كە (15 ميلليون تەڭگە) دەيىن تومەندەتۋ؛
كەيبىر سالالار ءۇشىن 10 پايىز تومەندەتىلگەن مولشەرلەمەنى بەلگىلەي وتىرىپ، ققس مولشەرلەمەسىن 12 پايىزدان 16 پايىزعا دەيىن ۇلعايتۋ.