قازاقستاندا حالىق سانى جاڭا مەجەدەن استى

قازاقستاندا حالىق سانى 20,6 ميلليوننان استى, دەپ حابارلايدى dalanews.kz.

ۇلتتىق ستاتيستيكا بيۋروسى مەلٸمەتٸنشە, 1 تامىزداعى جاعداي بويىنشا قازاقستان حالقى 20 604 819 ادامعا جەتكەن.

جىل باسىنان بەرٸ حالىق سانى 104 997 ادامعا ارتقان. وسىلايشا كٶرسەتكٸش جاڭا مەجەگە جەتتٸ.

ەڭ كٶپ حالىق الماتىدا (2,38 ميلليون ادام), تٷركٸستان وبلىسىندا (2,14 ميلليون ادام) تۇرادى. استانادا حالىق سانى بٸر ايدا شامامەن 8 مىڭ ادامعا كٶبەيٸپ, 1,69 ميلليونعا جەتتٸ. ەلوردادا حالىق ٶسٸمٸنٸڭ ەڭ جوعارى قارقىنى تٸركەلدٸ.

قازاقستاندىقتاردىڭ 13,2 ميلليونى قالالاردا, ال 7,39 ميلليونى اۋىلدىق جەرلەردە تۇرادى. جىل باسىنان بەرٸ قالا حالقى كٶبەيسە, اۋىل حالقى 21 652 ادامعا ازايعان.