قازاقستاندا حالىقارالىق ءىرى ەسىرتكى جەلىلەرى اشكەرەلەندى، دەپ حابارلايدى Dalanews.kz.

باس پروكۋرور بەرىك اسىلوۆتىڭ ايتۋىنشا، تەرگەۋ بارىسىندا 1 ملرد 155 ملن تەڭگە قولما-قول اقشا، سونداي-اق مەملەكەت كىرىسىنە 3،2 ملرد تەڭگەدەن استام قاراجات وندىرىلگەن. بۇدان بولەك، 734 مىڭ تەڭگە كولەمىندەگى كريپتوۆاليۋتاعا تىيىم سالىنىپ، 500 ملن تەڭگەدەن استام مۇلىك تاركىلەنگەن.

ونىڭ دەرەگىنشە، شىمكەنتتە Telegram ارقىلى جۇمىس ىستەگەن 300-دەن استام قاتىسۋشىسى بار حالىقارالىق ەسىرتكى جەلىسى جويىلدى. تەك ەكى فيگۋرانتتىڭ قارجىلىق ترانزاكسيالارى 7 ملن دوللاردان اسقان. 24 ادام ۇستالىپ، ولاردىڭ اراسىندا رەسەي، وزبەكستان جانە اۋعانستان ازاماتتارى بار. اقشا دروپپەرلەردىڭ كارتالارى مەن تىركەلمەگەن كريپتوبيرجالار ارقىلى شەتەلدەگى ۇيىمداستىرۋشىلارعا اۋدارىلىپ وتىرعان. قالا اۋماعىندا ەكى ەسىرتكى زەرتحاناسى انىقتالىپ، جويىلعان. وندا دايىن مەفەدرون، بۋىلىپ-تۇيىلگەن ەسىرتكى توپتامالارى، ارنايى قۇرال-جابدىقتار تابىلعان.

ۇلىتاۋ وبلىسىندا Telegram-دۇكەن Kaef Mafia-نىڭ قىزمەتى توقتاتىلدى. سيفرلىق اكتيۆتەر مەن كريپتوۆاليۋتالىق ءامياندار قوسا ەسەپتەلگەندە، مەملەكەت كىرىسىنە 3،2 ملرد تەڭگەدەن استام قارجى ءوندىرىلدى.

ماڭعىستاۋ وبلىسىندا Dune-Operator 24/7 جەلىسىنىڭ مۇشەلەرى ەسىرتكى ساۋداسىنان تۇسكەن اقشانى بانككە وتكىزۋگە تىرىسقان. ناتيجەسىندە 1 ملرد 155 ملن تەڭگە جانە 176 مىڭ دوللار تاركىلەندى. سونداي-اق سوت كاسىپكەردىڭ ەسەپشوتىنداعى 1 ملرد تەڭگەگە جانە 734 مىڭ دوللار كولەمىندەگى كريپتواميانعا بۇعات قويدى.