2025 جىلدان باستاپ قازاقستاندا جاڭا تۇرعىن ءۇي نارىعىنداعى ەرەجەلەر وزگەرەدى. پارلامەنت ۇلەستىك قۇرىلىسقا باقىلاۋدى كۇشەيتەتىن زاڭدى قابىلدادى، دەپ حابارلايدى Dalanews.kz.
زاڭعا قول قويىلعاننان كەيىن نە وزگەرەدى:
- قۇرىلىسقا رۇقسات الىنعانعا دەيىن پاتەرلەر مەن كوممەرسيالىق ءۇي-جايلاردى الدىن الا ساتىپ الۋ-ساتۋ شارتتارىن جاساۋعا تىيىم سالىنادى؛
- ەگەر قۇرىلىس سالۋشىنىڭ ۇلەسكەرلەردەن اقشا تارتۋعا قۇقىعى بولماسا، جاڭا قۇرىلىس نىساندارىن جارنامالاۋعا بولمايدى؛
- اكىمدىكتەر قۇرىلىسقا اقشا كىمنەن جانە قالاي جينالىپ جاتقانىن باقىلاپ وتىرادى؛
- رۇقساتسىز تۇرعىن ۇيلەردەگى پاتەرلەرگە يپوتەكا راسىمدەۋگە تىيىم سالىنادى؛
- بارلىق ەسەپ ايىرىسۋ تەك قولما-قول ەمەس جولمەن جۇرگىزىلەدى – كولەڭكەلى سحەمالاردى بولدىرماۋ ءۇشىن؛
- قۇرىلىستى اياقتاۋ مەرزىمىن ۇزارتۋ ۋاقىتى قىسقارادى – بۇرىن 9 اي بولسا، ەندى ەڭ كوبى 5 اي عانا.
سونداي-اق ىنتالاندىرۋ شارالارى ەنگىزىلەدى: ءۇيدىڭ قاڭقاسى تۇرعىزىلعاننان كەيىن قۇرىلىس سالۋشىلارعا قويىلاتىن تالاپتار جەڭىلدەتىلەدى، اكيماتتىڭ رۇقساتىن العان سوڭ ۇلەسكەرلەردىڭ اقشاسىن بىردەن پايدالانۋعا مۇمكىندىك بەرىلەدى، قۇرىلىس سالۋشىنىڭ جارعىلىق كاپيتالىنا قويىلاتىن تالاپ 15 پايىزدان 10 پايىزعا دەيىن تومەندەتىلەدى.
ۇلەسكەرلەردى قولداۋ ورتالىعى قۇرىلۋى جوسپارلانىپ وتىر – بۇل زاڭ جوبالارىنىڭ زاڭدىلىعىنا جانە سالىمداردىڭ قاۋىپسىزدىگىنە قاتىستى اقپارات بەرەتىن كونسۋلتاتيۆتىك ورگان بولادى.
بۇرىن كەلىسىم ۇلەسكەر مەن قۇرىلىس سالۋشى اراسىندا جاسالاتىن بولسا، ەندى ولارعا بانك-اگەنت پەن ارنايى جوبالىق كومپانيا قوسىلادى. وسىلايشا، Krisha.kz مالىمەتىنشە، مامىلە ءتورت تاراپتىڭ قاتىسۋىمەن جاسالادى. بۇل رەتتە قۇرىلىس سالۋشى ۇلەستىك قۇرىلىسقا ءوزى تىكەلەي قاتىسپايدى، جوبانى ىسكە اسىراتىن جەكە جوبالىق كومپانيا قۇرادى.
«تۇرعىن ءۇي قۇرىلىسىنداعى ۇلەستىك قاتىسۋ، اۆتوجولدار جانە مۇگەدەكتىگى بار ادامداردى تاسىمالداۋ قىزمەتتەرىن كورسەتۋ ماسەلەلەرى تۋرالى» زاڭ ءالى تولىق قابىلدانعان جوق. ونى قابىلداۋ ءۇشىن پرەزيدەنتتىڭ قول قويۋى قاجەت.
