قازاقستاندا قىلمىس دەڭگەيى تومەندەدى: بۇل باعىتتا ەلىمىزدە قانداي شارالار اتقارىلدى؟

Dalanews 19 ءساۋ. 2023 16:12 388

قازاقستاندا قىلمىس دەڭگەيىنىڭ تومەندەۋى بايقالادى. بۇل وسى باعىتتاعى بيلىكتىڭ قابىلداعان ءىس-شارالارىنىڭ ناتيجەلى بولعانىن كورسەتەدى. باس پروكۋراتۋرانىڭ قۇقىقتىق ستاتيستيكا جانە ارنايى ەسەپكە الۋ جونىندەگى كوميتەتىنىڭ قىلمىستىق سالاداعى قۇقىقتىق اقپاراتتى قالىپتاستىرۋ دەپارتامەنتىنىڭ باسشىسى جانسەرىك بەيسەنوۆ جاۋاپتى مەكەمەلەردىڭ قىلمىسپەن قالاي كۇرەسىپ جاتقانى، سونداي-اق ەلىمىزدەگى قۇقىقتىق ستاتيستيكا تۋرالى ايتىپ بەردى.

– ستاتيستيكاعا سايكەس، 2023 جىلدىڭ ەكى ايىندا قىلمىس وتكەن جىلدىڭ سايكەس كەزەڭىمەن سالىستىرعاندا 13،9%-عا تومەندەگەن. سوتقا دەيىنگى تەرگەۋلەردىڭ باسىم بولىگى الماتى (4676) جانە استانا (3295)، شىمكەنت (1136) قالالارىنا، الماتى (1974)، قاراعاندى (1651)، اقتوبە (1196)، تۇركىستان (1133) جانە قوستاناي (1126) وبلىستارىندا تىركەلگەن، – دەدى قۇقىقتىق اقپاراتتى قالىپتاستىرۋ دەپارتامەنتىنىڭ باسشىسى جانسەرىك بەيسەنوۆ.

ەلىمىزدە 10 مىڭ ادامعا شاققاندا قۇقىق بۇزۋشىلىق دەڭگەيى 82 قىلمىستى قۇراعان. وڭىرلەر بويىنشا 10 مىڭ ادامعا شاققانداعى قىلمىستىڭ جوعارى كورسەتكىشى اتىراۋ (10 مىڭ تۇرعىنعا 94 قۇقىق بۇزۋشىلىق)، قاراعاندى (90)، سولتۇستىك قازاقستان (88)، قوستاناي (84) وبلىستارىندا تىركەلگەن. 10 مىڭ ادامعا شاققانداعى تىركەلگەن قىلمىستىق قۇقىق بۇزۋشىلىقتاردىڭ دەڭگەيىن ەسكەرە وتىرىپ، رەسپۋبليكالىق ماڭىزى بار قالالار مەن وبلىس ورتالىقتارىنداعى قىلمىس تۋرالى اقپارات تالداندى. قىلمىستىق وقيعالار ەڭ كوپ ورىن الاتىن قالالارعا تالدىقورعان (10 مىڭ ادامعا 172 قۇقىق بۇزۋشىلىق)، استانا (151)، پەتروپاۆل (146)، كوكشەتاۋ (143)، قوستاناي (136) جانە الماتى (134) جاتادى.

سونداي-اق پروكۋراتۋرا وكىلى كوميتەتتىڭ ەلەكتروندى فورماتتاعى پورتالى ارقىلى قاجەتتى جولداردى تولتىرىپ، ەسق نەمەسە تەلەفون نومىرىنە SMS راستاۋ ارقىلى قول قويىپ، پوليسياعا ءوتىنىش بەرۋگە بولاتىنىن اتاپ ءوتتى. بۇل سيفرلىق دامۋ قازاقستاندىقتاردىڭ قۇقىقتىق قاۋىپسىزدىگىن قامتاماسىز ەتۋگە ىقپال ەتەدى. سونىمەن قاتار «قۇقىق بۇزۋشىلىق تۋرالى ارىزدىڭ تىركەلۋىن تەكسەرۋ» بولىمىندە ارىزدى قابىلداۋ كەزىندە قۇقىق قورعاۋ ورگاندارى بەرگەن تالون ءنومىرىن كورسەتە وتىرىپ نەمەسە جسن ارقىلى ءوتىنىشتىڭ قاي كەزەڭدە قارالىپ جاتقانىن جانە ناتيجەسىن كورۋگە بولادى. ءتىپتى، ارىزداعى مالىمەتتەر تالون العان ساتتەن باستاپ 24 ساعات ىشىندە تەكسەرىلە باستايدى. ازاماتتىڭ ءوتىنىشىنىڭ قارالۋ مارتەبەسىن ونىڭ قاي ايماقتا بەرىلگەنىنە قاراماستان، پوليسيادان نەمەسە كوميتەتتىڭ سايتىنان تەكسەرۋگە بولادى.

– قۇقىقتىق اقپارات الۋدىڭ ىڭعايلى جولى دا ازىرلەندى. وتىنىشتەردىڭ ەڭ كوپ سانى قىلمىس جانە باسقا دا قۇقىقتىق ماسەلەلەر بويىنشا تولىق جانە سەنىمدى ستاتيستيكانى قاجەت ەتەتىن ازاماتتاردان – مەملەكەتتىك ورگانداردان، ستۋدەنتتەردەن، ماگيسترانتتاردان، ب ا ق وكىلدەرىنەن، عىلىم سالاسىنان تۇسەدى. وسى ماقساتتا قۇقىقتىق ستاتيستيكا قىزمەتى ازىرلەندى، – دەپ ءتۇسىندىردى جانسەرىك بەيسەنوۆ.


ەلىمىزدەگى قىلمىستىڭ جاي-كۇيىن، تىركەلگەن جول-كولىك وقيعالارىن، كاسىپكەرلىك سۋبەكتىلەرىنىڭ قىزمەتى تۋرالى اقپاراتتى كوميتەت پورتالىندا دا ورنالاستىرىلعان گەوگرافيالىق اقپاراتتىق كارتالار ارقىلى بىلۋگە بولادى. قىلمىستىق قۇقىق بۇزۋشىلىقتار كارتاسىن پايدالانۋ كەزىندە قازاقستان ازاماتى اۋماقتىق قامتۋ، ۋاقىت كەزەڭى جانە قىلمىستىق كودەكستىڭ جەكەلەگەن باپتارى بويىنشا قۇقىق بۇزۋشىلىقتار تۋرالى ستاتيستيكالىق اقپاراتتى دا الا الادى.

پروكۋراتۋرا وكىلىنىڭ ايتۋىنشا، كارتادا جاسالعان قۇقىق بۇزۋشىلىقتار تۋرالى اقپارات پوليسيا قىزمەتكەرلەرى ERDR اقپاراتتىق جۇيەسىندە قۇقىق بۇزۋشىلىقتىڭ ورنى تۋرالى قاجەتتى اقپاراتتى تولتىرعاننان كەيىن اۆتوماتتى تۇردە كورسەتىلەدى. وڭىردەگى قىلمىستىڭ ديناميكاسىن كورسەتەتىن ستاتيستيكانىڭ كەز كەلگەن ءبولىمىن دە بولەك اشىپ، قاراۋعا بولادى. بۇل قاي وبلىستار، قالالار مەن اۋدانداردىڭ قىلمىستىلىعى جوعارى ەكەنىن تالداۋعا مۇمكىندىك بەرەدى.

– كارتا قىلمىستىق ارەكەتتىڭ وشاقتارىن انىقتاۋعا، جيناقتالۋ مەكەنجايلارىن بىلۋگە، جان-جاقتى تالداۋ جۇرگىزۋگە ىقپال ەتەدى. وسىلايشا، قۇقىق بۇزۋشىلىقتىڭ الدىن الۋ بويىنشا كۇشتەر مەن قۇرالداردى ۇتىمدى ۇيلەستىرۋدى قامتاماسىز ەتۋگە بولادى، – دەپ قوستى ول.

سونداي-اق، كوميتەتتىڭ جانە ونىڭ اۋماقتىق ورگاندارىنىڭ اقپاراتتىق-انىقتامالىق قىزمەتى قىلمىسقا، ەسىرتكى جانە پسيحوتروپتىق زاتتاردىڭ زاڭسىز اينالىمىنا قارسى ءتيىمدى كۇرەس جۇرگىزۋگە مۇمكىندىك تۋدىراتىنىن بىلگەن ءجون. بۇل رەسپۋبليكانىڭ بارلىق مەملەكەتتىك ورگاندارىنىڭ قىزمەتىن ۇيلەستىرەدى. سونىمەن قاتار، تەرروريزمنىڭ، ەكسترەميزمنىڭ، ترانسشەكارالىق جانە حالىقارالىق قىلمىستىڭ، ادام ساۋداسى مەن زاڭسىز كوشى-قوننىڭ كورىنىستەرىنە قارسى كۇرەستى ۇيىمداستىرۋعا سەپتەسەدى. سونداي-اق قۇقىقتىق ءتارتىپتى قامتاماسىز ەتۋ، ازاماتتاردىڭ كونستيتۋسيالىق قۇقىقتارى مەن بوستاندىقتارىن قورعاۋدىڭ وزگە دە وزەكتى ماسەلەلەرىن تالداۋعا بولادى.

 

➡️  قازاقستانعا سوعىستان باس ساۋعالاپ قاشىپ كەلگەن ياكۋت ءانشىسى ءپۋتيندى سويىپ سالدى... تولىق اقپارات سىلتەمەدە:

https://t.me/dalainside/1280

https://dalanews.kz/aimak/88328-turkistan-oblysynda-soltustik-ongirl

https://dalanews.kz/del-qazir/88294-biz-manggurt-ekenbiz-qazaqstanga-qash

 

https://dalanews.kz/suranys/88289-alemde-ayes-salu-qaytadan-qarqyn-aldy

ۇسىنىلعان
سوڭعى جاڭالىقتار