پرەمەر-مينيستر ولجاس بەكتەنوۆ دەپۋتاتتاردىڭ ساۋالىنا جاۋاپ بەرىپ، قازاقستان شەتەلدىك مۇناي ءوندىرۋشى كومپانيالارمەن جاسالعان كەلىسىمدەردى ءبىرجاقتى قايتا قاراۋعا قۇقىعى جوق ەكەنىن مالىمدەدى، دەپ حابارلايدى Dalanews.kz.
ءماجىلىس دەپۋتاتتارى ۇكىمەتتەن نە سەبەپتى ەل ءونىمدى ءبولۋ تۋرالى كەلىسىمدەر (وبك) مەن ەكولوگيالىق زاڭبۇزۋشىلىقتار اياسىندا شەتەلدىك مۇناي-گاز كومپانيالارىنان ءىرى كولەمدەگى قاراجاتتى وندىرە الماي وتىرعانىن سۇراعان. سونداي-اق ولار حالىقارالىق اربيتراجداردىڭ ۇزاققا سوزىلىپ، كەي جاعدايدا قازاقستان ءۇشىن ءتيىمسىز اياقتالاتىنىنا نازار اۋداردى. دەپۋتاتتاردىڭ ايتۋىنشا، سالىنعان ايىپپۇلداردىڭ دا ۆاليۋتا باعامىنىڭ وزگەرۋىنە بايلانىستى ناقتى قۇنى تومەندەپ بارادى.
ۇكىمەت باسشىسىنىڭ تۇسىندىرۋىنشە، قازاقستان اۋماعىندا انىقتالعان ەكولوگيالىق زاڭبۇزۋشىلىقتار تەك ۇلتتىق زاڭناما شەڭبەرىندە قارالادى. ال مۇنداي قۇقىقبۇزۋشىلىقتار ءۇشىن سالىناتىن اكىمشىلىك ايىپپۇلدار تەك تەڭگەمەن بەلگىلەنەدى.
بەكتەنوۆ ايىپپۇلداردى شەتەل ۆاليۋتاسىنا اۋىستىرىپ ەسەپتەۋ نەمەسە ولاردى ۆاليۋتالىق شىعىن رەتىندە كورسەتۋ زاڭ جۇزىندە نەگىزسىز ەكەنىن ايتتى. سوندىقتان مۇنداي ءتاسىل تاجىريبەدە قولدانىلمايدى.
سونىمەن قاتار 2022 جىلى اتىراۋ وبلىسىندا ەكولوگتار سولتۇستىك كاسپيي جوباسى اياسىندا تەكسەرۋ جۇرگىزىپ، ءبىرقاتار زاڭبۇزۋشىلىقتى انىقتاعان. سول كەزدە سالىنعان ايىپپۇلداردىڭ ءبىر بولىگى وندىرىلگەن.
ال سولتۇستىك كاسپيي مەن قاراشىعاناق جوبالارىنا قاتىستى حالىقارالىق اربيتراجدارعا كەلسەك، ۇكىمەت بۇل داۋلاردىڭ كوممەرسيالىق سيپاتتا ەكەنىن اتاپ ءوتتى. ولار مەملەكەت پەن مەردىگەر كومپانيالار اراسىنداعى وبك تالاپتارىنان تۋىندايدى جانە ۇلتتىق سوتتاردا ەمەس، حالىقارالىق اربيتراجدىق الاڭداردا قارالادى. مۇنداي پروسەستەر، پرەمەر-مينيستردىڭ ايتۋىنشا، ۇزاق ءارى قوماقتى شىعىندى تالاپ ەتەدى.
ءقازىر قازاقستان بۇل ىستەر بويىنشا حالىقارالىق كەڭەسشىلەر مەن تەحنيكالىق ساراپشىلاردى تارتقان. ولار مۇناي-گاز جوبالارىنداعى وپەراسيالارعا جان-جاقتى اۋديت جۇرگىزىپ جاتىر.
