قازاقستاندا قوعامدىق تاماقتانۋ سالاسى سەرپىندى دامۋدا — 2025 جىلدىڭ توعىز ايىنىڭ قورىتىندىسى بويىنشا ەلدە 55 جاڭا مەيرامحانا ىسكە قوسىلدى. بۇل — سوڭعى جەتى جىلداعى ەڭ جوعارى كورسەتكىش جانە قولجەتىمدى دەرەكتەر تاريحىنداعى ءابسوليۋتتى رەكورد. بيۋرو ۇلتتىق ستاتيستيكاسىنىڭ (بنس اسپير رك) مالىمەتىنشە، وتكەن جىلمەن سالىستىرعاندا ءوسىم 1،8 ەسە ارتقان دەپ حابارلايدى Dalanews.kz
ورىن سانى مەن قۇنى
جاڭا مەيرامحانالارداعى جالپى ورىن سانى 2025 جىلدىڭ قاڭتار–قىركۇيەك ارالىعىندا 16،2 مىڭدى قۇرادى. بۇل — 2018 جىلدان بەرگى ەڭ جوعارى دەڭگەي (سول جىلى — 19،4 مىڭ ورىن بولعان).
دەگەنمەن، ءبىر مەيرامحاناعا شىققانداعى ورتاشا ورىن سانىن ەسەپتەۋ مۇمكىن ەمەس، سەبەبى جاڭا اشىلعان نىساندار مەن قايتا جوندەلگەن مەيرامحانالار ستاتيستيكادا بولەك ەسەپتەلەدى.
ءبىر ورىننىڭ ورتاشا قۇنى شامامەن 3،5 ملن تەڭگەنى قۇراپ وتىر — بۇل بىلتىرعىدان 46% جوعارى. ال جالپى ەنگىزىلگەن نىسانداردىڭ قۇنى 57 ملرد تەڭگەگە جۋىقتاعان (جىلدىق ءوسىم — 2،7 ەسە).
ايماقتار كوشباسشىلارى
مەيرامحانالار گەوگرافياسى بىركەلكى ەمەس. كوشتى تۇركىستان وبلىسى باستاپ تۇر — مۇندا 23 جاڭا نىسان اشىلعان، ياعني ەل بويىنشا بارلىق مەيرامحانالاردىڭ 40%-دان استامى وسى وڭىرگە تيەسىلى.
ەكىنشى ورىندا — قىزىلوردا وبلىسى (7 مەيرامحانا)، ءۇشىنشى ورىندا — اتىراۋ وبلىسى (5 مەيرامحانا).
استانادا بار بولعانى ءبىر عانا مەيرامحانا ىسكە قوسىلعانىمەن، وندا ءبىر ورىننىڭ ورتاشا قۇنى 12،3 ملن تەڭگەگە جەتكەن. مەيرامحانا 200 ورىنعا ەسەپتەلگەن.
ال الماتىدا رەسمي ستاتيستيكا جاڭا مەيرامحانالار اشىلعانىن تىركەمەگەن.
كافەلەر دە رەكورد ورناتۋدا
مەيرامحانالارمەن قاتار، كافەلەر سانى دا رەكورد جاڭارتتى. توعىز ايدا ەلدە 68 جاڭا كافە پايدالانۋعا بەرىلگەن — بۇل سوڭعى التى جىلداعى ەڭ جوعارى كورسەتكىش. ولاردا 4،9 مىڭ ورىن بار، ال جالپى ينۆەستيسيا كولەمى 11،7 ملرد تەڭگەنى قۇرادى.
جالپى كورسەتكىشتەر
2025 جىلدىڭ باسىنداعى مالىمەت بويىنشا، قازاقستاندا بارلىعى:
- 2،4 مىڭ مەيرامحانا – 339،1 مىڭ ورىنعا؛
- 5،2 مىڭ كافە – 293،4 مىڭ ورىنعا قىزمەت كورسەتۋدە.
ەسكە سالا كەتسەك، بۇل دەرەكتەر زاڭدى تۇلعالاردىڭ بنس اسپير رك-عا جانە جەكە كاسىپكەرلەردىڭ جەرگىلىكتى اتقارۋشى ورگاندارعا تاپسىرعان ەسەپتەرى نەگىزىندە جيناقتالعان.
