ساۋدا جانە ينتەگراسيا ءمينيسترى ارمان شاققالييەۆتىڭ مالىمدەۋىنشە، ەلىمىزدە كۇنباعىس مايىنا شەكتى باعا 2025 جىلدىڭ سوڭىنا دەيىن بەلگىلەنەدى. ونىڭ ايتۋىنشا، بۇل باعىتتا وندىرۋشىلەرمەن بەلگىلى ءبىر كەلىسىمگە قول جەتكىزىلگەن، دەپ حابارلايدى Dalanews.kz.
"ءبىز بۇل ماسەلەدە سالالىق قاۋىمداستىقتارمەن جانە اۋىل شارۋاشىلىعى مينيسترلىگىمەن كەلىسىم جاسادىق. جىل سوڭىنا دەيىن كۇنباعىس مايىنىڭ باعاسىنا بەلگىلى ءبىر شەك قويىلادى. ءبىراق بۇل – مەملەكەتتىك رەتتەۋ ەمەس. بۇل – وندىرۋشىلەر تاراپىنان جاسالعان ىزگى نيەت پەن ءوزارا كەلىسىمنىڭ ناتيجەسى"، – دەدى مينيستر ۇكىمەتتەگى بريفينگ بارىسىندا.
سونداي-اق مينيستر 1 تامىزدان باستاپ تۇز وندىرۋشىلەردىڭ كوتەرمە باعاسىن تومەندەتۋ شارالارى كۇشىنە ەنگەنىن ايتتى.
الايدا ساراپشىلار كۇزدە وسىمدىك مايىنىڭ قىمباتتاۋىن بولجايدى. وتكەن جىلى باعانىڭ ءوسۋىن مول ءونىم تەجەگەن بولسا، بيىل اۋا رايىنىڭ قولايسىزدىعى مەن زيانكەستەر كۇنباعىس ەگىسىنە ايتارلىقتاي زيان كەلتىرگەن. وندىرۋشىلەردىڭ ايتۋىنشا، 2024 جىلدىڭ قىركۇيەگىنەن بەرى كۇنباعىس تۇقىمىنىڭ باعاسى 66%-عا وسكەن. بۇل ءوز كەزەگىندە كۇنباعىس مايىنىڭ دا كەمىندە جارتى ەسەگە قىمباتتاۋىنا سەبەپ بولۋى مۇمكىن.
