قازاقستاندا كۇدىكتىلەردى قاماۋدا ۇستاۋ مەرزىمىن ۇزارتۋعا قاتىستى نورما زاڭنامالىق تۇرعىدان وزگەرۋى مۇمكىن، دەپ حابارلايدى Dalanews.kz.
كونستيتۋسيالىق سوتتىڭ حابارلاۋىنشا، اتالعان شەشىم كونستيتۋسيالىق سوتتىڭ تۇپكىلىكتى قورىتىندىسىندا ايتىلعان قۇقىقتىق تۇجىرىمدار نەگىزىندە قابىلدانعان. وندا ۇكىمەتكە قىلمىستىق-پروسەستىك كودەكستى (قپك) جەتىلدىرۋ ماسەلەسىن قاراستىرۋ ۇسىنىلعان.
اتاپ ايتقاندا، كونستيتۋسيالىق سوت ازاماتتىڭ قپك-نىڭ 152-بابىنىڭ 6-بولىگىنىڭ كونستيتۋسياعا سايكەستىگىن تەكسەرۋ تۋرالى ءوتىنىشىن قاراعان. بۇل نورماعا سايكەس، كۇدىكتى مەن ونىڭ قورعاۋشىسى قىلمىستىق ءىس ماتەريالدارىمەن تانىسقان كەزەڭى تەرگەۋ بارىسىندا قاماۋدا ۇستاۋ مەرزىمىنە كىرمەيدى. الايدا سوت ۇكىم شىعارعاندا بۇل ۋاقىت ەسەپكە الىنادى.
ءوتىنىش يەسى — ازاماتشا ا. — تەرگەۋ امالدارى اياقتالعاننان كەيىن دە، ءوزى ءىس ماتەريالدارىمەن تانىسۋدان باس تارتقانىنا قاراماستان، قاماۋدا ءبىر جىلدان استام ۋاقىت وتىرعانىن العا تارتقان. وسى ۋاقىت ىشىندە ونىڭ قورعاۋشىسى مەن باسقا دا تاراپتار ءىس ماتەريالدارىمەن تانىسۋدى جالعاستىرعان. بۇل جاعداي ازاماتشانىڭ پىكىرىنشە، ونىڭ كونستيتۋسيامەن كەپىلدەندىرىلگەن جەكە باس بوستاندىعىن بۇزعان.
كونستيتۋسيالىق سوت بۇل ماسەلەگە تۇسىنىكتەمە بەرە وتىرىپ، ءىس ماتەريالدارىمەن تانىسۋ كەزەڭىندە كۇدىكتىنى قاماۋدا ۇستاۋ ارنايى تەرگەۋ سۋدياسىنىڭ سانكسياسىمەن جانە قپك-دا بەلگىلەنگەن تارتىپپەن ۇزارتىلۋى قاجەت ەكەنىن اتاپ ءوتتى.
“ەگەر كۇدىكتى مەن ونىڭ قورعاۋشىسى ءىس ماتەريالدارىمەن تانىسۋدى ادەيى سوزاتىن بولسا، تەرگەۋ ورگانى ماتەريالدارمەن تانىسۋدىڭ ناقتى كەستەسىن جاساپ، ونى پروكۋروردىڭ بەكىتۋىمەن بەلگىلى ءبىر مەرزىم بەلگىلەي الادى. سونىمەن قاتار قورعاۋشى مەن كۇدىكتى اراسىندا ءوزارا كەلىسىم بولماعانى اتالعان نورمانى كونستيتۋسياعا قايشى دەپ تانۋعا نەگىز بولا المايدى. مۇنداي جاعدايدا تەرگەۋ ورگانى كۇدىكتىنىڭ دە پىكىرىن ەسكەرە وتىرىپ، تانىسۋ كەستەسىن بارشا قاتىسۋشىلار ءۇشىن جەكە-جەكە بەلگىلەيدى”، – دەلىنگەن سوت حابارلاماسىندا.
بۇدان بولەك، كونستيتۋسيالىق سوت كۇدىكتىنى قاماۋدا ۇستاۋعا قاتىستى ءبىرقاتار ماسەلەلەردىڭ جەتكىلىكسىز رەتتەلگەنىن اتاپ ءوتتى.
“اتاپ ايتقاندا، قپك-دە كورسەتىلگەندەي، قاماۋدا ۇستاۋ مەرزىمىن تەرگەۋدىڭ ءار كەزەڭىنە ءبولىپ قاراستىرۋ سوت سانكسياسىنىڭ شەكتى مەرزىمدەرىن اينالىپ وتۋگە جول اشۋى مۇمكىن. قولدانىستاعى تاجىريبەدە ءىس ماتەريالدارىمەن تانىسۋ ۋاقىتىنا بايلانىستى قاماۋدا ۇستاۋ مەرزىمىنىڭ ەسەبى توقتايدى. بۇل – كۇدىكتى مەن قورعاۋشىسى تانىسۋعا قاتىسپاعان كۇندەردىڭ دە جالپى مەرزىمنەن شىعارىلىپ تاستالۋىنا اكەپ سوعادى. سونىمەن قاتار، قپك نورمالارىندا قورعاۋشى مەن كۇدىكتىنىڭ اراسىندا قاراما-قايشىلىق بولعان جاعدايدا سوڭعى كەزەڭدەگى زاڭ كومەگىن كورسەتۋ ءتارتىبى ناقتى رەتتەلمەگەن”، – دەلىنگەن مالىمدەمەدە.
كونستيتۋسيالىق سوتتىڭ №74 نورماتيۆتىك قاۋلىسى قابىلدانعان كۇننەن باستاپ كۇشىنە ەنەدى، قازاقستان رەسپۋبليكاسىنىڭ بۇكىل اۋماعىندا مىندەتتى جانە تۇپكىلىكتى بولىپ تابىلادى، شاعىم جاساۋعا جاتپايدى.
